Zeraingo EH Bilduk zerrenda "berria" eta "anitza" aurkeztu du

Udalarentzat herritar guztiak "berdinak" izatea, eskola indartzea eta gazteei herrian bizitzeko aukera ematea proposatu dute, besteak beste.

Maialen Igartua

Zerain

2015/05/21

Zeraingo EH Bilduko kideak: Amaia Junquera, Arantxa Ruiz de Larrinaga alkategaia eta Jose Mari Apaolaza. / Maialen Igartua

Lehen aldiz aurkeztu du EH Bilduk hautagaitza Zerainen. Udalean aniztasuna egotea eta orain arte udalean ordezkaritzarik izan ez duen jendeari horretarako aukera ematea izan dira hautagaitza aurkezteko arrazoiak, Arantxa Ruiz de Larrinaga alkategaiaren hitzetan. Asmoa udalean ordezkaritza lortu eta Herri Kandidaturakoekin elkarlanean aritzea bazen ere, hautagaitza erretiratuko dutela jakinarazi zuen Herri Kandidaturak. Hortaz, udal gobernua osatzea egokituko zaio EH Bilduri. Programa aurkeztu dute gaur. Hari gara egitasmoaren bidez herritarrengandik jasotako proposamenetan oinarrituta prestatu dute programa. Hainbat puntu jasotzen ditu, baina garrantzitsuenen artean daude “herritar guztiak udalarentzat berdinak izatea”, diru kudeaketan gardentasuna, parte hartzea sustatzea eta eskola indartzea. Bestalde, herrian bizitzeko “aukera erreala” eskaini nahi diete Zeraingo gazteei eta nagusiei. Horretarako proiekturen bat garatuko dutela esan dute. Era berean, goi tentsioko linearen aurka lan egiteko konpromisoa hartu dute.

Zerrenda anitza Zeraingo EH Bilduren zerrenda osatzen duten kide guztiak berriak dira udalean, eta jatorri anitzekoak. Hori bai, batzuk Zerainen jaioak ez izan arren, “denak zeraindarrak” direla nabarmendu du Ruiz de Larrinagak. “Denetik daukagu zerrendan: jubilatuak, langileak, lehen sektorekoak, ikasleak…”. Generoari dagokionez ere aldaketa dago, lehen aldia baita Zeraingo udalerako emakumezko alkategaia aurkezten dena. Herri Kandidaturak zerrenda erretiratu izana “tristea” dela adierazi dute, elkarlanean aritzea baitzen beren helburua. Dena den, udaletik kanpo bada ere, elkarlan horri ez diotela aterik itxiko argitu dute, eta herritar guztiengana iristen saiatuko direla.

Azken elkarrizketak

Azken bideoak

Argitalpen bereziak