Gure Esku Dagoren aldarri koloretsua Katalunian
Sant Vicenç dels Horts herrian izan da asteburuan Goierriko ordezkaritza bat. Giza gaztelua egiten ere ausartu dira goierritarrak.
Oso harreman polita eta aberatsa sortzen ari da Goierriren eta Sant Vicenç dels Hors (Herrialde Katalanak) herrien artean. Gure Esku Dago taldeak koral kolorez eta erabakitzeko eskubidearen aldarrikapenaz jantzi ditu asteburuan San Vicenç dels Horsko festak. Harrera beroa egin diete kataluniarrek goierritarrei. “Herri guztiak eta udalak, Oriol Junqueras alkatea barne, egin diguten harrera oso polita izan da”, diote Gure Esku Dagokoek.
Asteburu borobila
Larunbatean goizaldeko 02:30ak aldera abiatu zen aldarrikapen autobusa. Herriko ikastetxe bat izan zuten lo lekua eta iritsi eta berehala zintzilikatu zuten Beasainen aldarrikapen oihalekin osatutako Euskal Herriaren irudi koloretsua.
Igandea, berriz, erakustaldi eguna izan zen: herri kirolariak, dantzariak, joaldunak, trikitilariak… euskal kulturaren eta nortasunaren erakusgarri izan ziren. Taloak ere egin zituzten.
Giza gazteluarekin ezustea
Jaialdiaren bukaerarako utzi zuten goierritarrek kataluniarrei prestatutako ezustekoa: Castellersa edo giza gaztelua. Aho zabalik eta hunkituta geratu ziren kataluniarrak.
Goierriko Gure Esku Dagoko kideen ustez, “bi herri ezberdin gara baina helburu bera dugu: erabakitzeko eskubidea aurrera eramateko nahia. Hurrengo urtean Goierrin egingo dugun galdeketan ahal dutenean laguntzeko prest daudela esan digute. Garbi ikusten da kataluniarrek eta euskaldunok elkarri diogun miresmena”.
Gure Esku Dagotik eskerrak eman nahi dizkie Kataluniara joan diren dantzariei, joaldunei, trikitilariei, herri kirolariei, talogileei, giza gaztelua egin dutenei eta herritarrei.
Giza gaztelua egin zuten goierritarrek.
