Igartzako lasterketarekin hasiko da mendi duatloien zirkuitua

Larunbatean 16:00etan izango da Beasainen; haurrentzako probak ere antolatu dituzte. Gaur zirkuitua ezagutuko dute 19:00etan. Guztira hamabost lasterketa jokatuko dira

Loinaz Agirre

Beasain

2015/09/01

Igartzako mendi duatloia.

Ohi baino astebete lehenago, datorren larunbatean, egingo dute aurten Beasaingo III. Igartzako mendi duatloia. Era horretan, 2015eko Euskal Herriko Mendi Duatloi Zirkuituari Beasainen emango zaio hasiera. Kirolariek Igartza auzoko baserri bideetan barrena osatuko dute 20 kilometro pasatxoko ibilbidea, korrika eta bizikletaz; hiru sektore izango ditu lasterketak. Lehenengo 5,41 km egin beharko dituzte korrika. Bigarren zatian bizikletak hartu eta 13,36 km osatu beharko dituzte. Azkeneko zatia ere korrika egin beharko dute, 3,15 km. Florenzio Axpe plazako irteera puntutik 16:00etan abiatuko dira lasterkariak. Dagoeneko irekita dago izena emateko epea, mendiduatloia.com webgunean. Ibilbide gogorra Xiker Mujika lasterketaren antolatzaileak adierazi duenez, lasterketa «oso gogorra» da Igartzakoa. «Korrikako saioan Errekarte Txiki baserritik Arrieta baserrira bitartekoa eta bizikletaren kasuan, Agerre baserritik Otaño baserrirainoko tarteak oso gogorrak dira. Kilometro bateko zatiak dira biak ere, baina gainerakoa lasaiagoa da», zehaztu du beasaindarrak. Ibilbidea ezagutzeko, gaur, 19:00etan, Antzizar kiroldegian hitzordua jarri dute antolatzaileek. Korrikako lehenengo sektorea korrika egingo dute eta, bigarren eta hirugarren sektoreak, berriz, txirrinduz. Mujikak jakinarazi duenez, «txirrindua eta zapatilak garaje batean gordeko ditugu, korrikako saioa egiterakoan». Iaz 93 kirolarik parte hartu zuten eta aurten kopurua berdintzearekin konforme dira antolatzaileak. Parte hartzaileen artean zozketak egingo dituzte 18:30etik aurrera, sari banaketaren ondoren. «Giro ona sortuko da lasterketaren amaieran parte hatzaileentzat oilasko erreak prestatuko ditugu eta».

Haurrentzat eta gaztetxoentzat lasterketak larunbat goizean Berrikuntza bat izango da larunbatean Igartzako proban: haurrentzako eta gaztetxoentzako lasterketak. Goizean izango dira eta 10:30ean egongo da izena emateko aukera. Adinka banatu dituzte lasterketak. 11:00etan, 2010-2012ra jaiotakoak aterako dira; 11:15ean 2007tik 2009ra jaiotakoak; 11:30ean 2004tik 2006ra jaiotakoak eta 12:00etan 2000tik 2003ra jaiotakoak.

Urriaren 3an Arriaranen Hamabost lasterketek osatuko dute V. Euskal Herriko Mendi Duatloi Zirkuitua. Gipuzkoan, Bizkaian, Araban, Nafarroan eta Lapurdin jokatuko dira probak. Igartzakoaz gain, beste proba bat ere jokatuko da Beasainen; Arriaran auzoan hain zuzen ere, urriaren 3an. Aitor Mendizabal antolatzaileak aurreratu duenez, zirkuitu zaharra berreskuratuko dute, aldaparik handiena kenduz. Izan ere, euriarekin arriskutsua jartzen da ibilbideko zati hori eta min hartzeko arriskua izan dezakete korrikalariek. Ohi bezala, ibilbidea auzolanean txukunduko dute arriarandarrek. Irailaren 19an jarri dute lanerako hitzordua. Euskal Herriko zirkuituko egutegia – Irailak 5. Beasain, Igartzan. – Irailak 12. Ibarra (Gipuzkoa). – Irailak 20. Urduña (Bizkaia). – Irailak 26. Mallabia (Bizkaia). – Urriak 3. Beasain, Arriaranen. – Urriak 11. Lizarra (Nafarroa). – Urriak 17. Amurrio (Araba). – Urriak 25. Zalla (Bizkaia). – Urriak 31. Zubieta (Gipuzkoa). – Azaroak 8. Usansolo (Bizkaia). – Azaroak 15. Zeberio (Bizkaia). – Azaroak 22. Amasa (Gipuzkoa). – Azaroak 29. Biriatu (Lapurdi). – Abenduak 6. Leioa (Bizkaia). – Abenduak 13. Zeanuri (Bizkaia).

Azken elkarrizketak

Azken bideoak

Argitalpen bereziak