Urria, kulturaz gozatzeko hila

Familia giroan kultura partekatzeko ‘Hip-Hip Ürri!’ egitasmoa asteburuan abiatuko da. Goierri beheko 16 herritan 39 kultur jarduera egingo dira urriko asteburuetan

I. Gurrutxaga

Altzaga,Arama,Beasain,Gabiria,Idiazabal,Itsasondo,Lazkao,Legorreta,Mutiloa,Olaberria,Ordizia,Ormaiztegi,Segura,Zaldibia,Zegama,Zerain

2015/09/29

Hip-Hip Ürri! egitasmoaren logoa.

Haurrak eta kultura dira Hip-Hip Ürri! egitasmoaren oinarria. Orain hamalau urte Drenthen (Herbereak) sortutako October Children’s Month (Urria, haurren hilabetea) kultur proiektuaren euskal aldaera Goierriko beheko 16 herritara iritsiko da urriko asteburuetan. Udalek, kultur, kirol eta gizarte taldeek, eta museo eta interpretazio zentroek parte hartu dute programazioaren osaketan, eta guztira 39 kultur jardueraz gozatzeko aukera izango da. Donostia 2016ko Europako Kultur Hiriburu izango dela eta, 2013an iritsi zen Europa mailako izaera duen egitasmo hori Gipuzkoako hiriburura. Harrera ona izan zuenez, iaz bigarren edizioa antolatu zuten, eta aurten hirugarrena ere bai. Ikertze kultur elkartea arduratu da kultur egitasmo horren dinamizazio lana egiteaz, eta Hip-Hip Ürri! herrialdera zabaltzeko bidean, Goierri da lehen geltokia. Bi baldintza bete behar dituzte soilik ekimen honetan parte hartu nahi duten udalerriek: kultur jarduerak urriko asteburuetan izatea eta umeek sarrerarik ordaindu beharrik ez izatea. Helduek ordaindu ala ez, jarduera bakoitzaren antolatzaileek erabakitzen dute. Askotariko jarduerak Asteburu honetan Goierri beheko sei herritan egingo dira programa honi lotutako kultur jarduerak. Askotarikoak eta ezberdinak dira, eta herri bakoitza ikuspegi propioz aritu da antolaketa lanetan. Proiektu orokor hau 6 eta 14 bitarteko haurren eta haien gurasoen kultur kontsumora bideratuta dago, baina Goierriren kasuan parte-hartze adina malguagoa da. Hip-Hip Ürri! (Goierriko egitaraua)

‘HIP-HIP ÜRRI!’ GOIERRIKO AGENDA. URRIAK 3 ETA 4 URRIAK 3, LARUNBATA Beasain. Gurpil festa Loinazko San Martin plazan (16:00-20:00). Erakustaldiak eta tailerrak ere egingo dira. Bi urtetik gorakoentzat. Antolatzaileak: Beasaingo Udala, Txilibutxof, Jazpana eta Orekan Bizi naiz. Ordizia. Ipuinak familia artean (Mertxe Aizpurua), liburutegian (11:00-12:00); Muxiko ikastaroa eta dantza tailer irekia Plaza Nagusian (17:30-18:30); Familia artean antzerkia tailerra Barrena kultur etxean (10:00-13:30 eta 16:00-19:30). Hiru urtetik gorako haurrentzat. Helduek 3 euro ordaindu behar dute. Aurrez eman behar da izena: urrupantzerkia@gmail.com. Ormaiztegi. 3D argazkigintza: XIX. mendean eta orain tailerra Zumalakarregi museoan (11:30-14:00). Zazpi urtetik gorako haurrentzat. Helduek 2 euro ordaindu behar dute (bi haur gehienez heldu bakoitzeko) URRIAK 4, IGANDEA Altzaga. Baserri giroa ezagutuaz mendi ibilaldia eta bisita gidatua (11:00-14:00). Altzagaratera igo, hamaiketakoa egin eta Abaliak auzoko baserri bat bisitatu. Lau urtetik gorako haurrentzat. Idiazabal. Familia-Zuhaitzak arabieraz tailer irekia plazan (18:00-20:00). Idiazabalen bizi diren marokoarrek euskal izenak arabieraz idazten irakatsiko diete parte-hartzaileei. Lau urtetik gorako haurrentzat. Zegama. Bost zentzuak egurrean tailer irekia Anduetza parketxean (11:00-12:30). Hiru urtetik gorako haurrentzat. Urriaren 3rako eman behar da izena Anduetzara deituta: 943 80 21 87.

Azken elkarrizketak

Azken bideoak

Argitalpen bereziak