Legorretan bat egingo dute 400. urtearen ospakizunek eta kultur asteak
Igandean hasiko da Legorretan 400. urteurreari (1615-2015) eskainitako urteko bigarren egitaraua. XX. mendearen erdialdean Jesus Eskisabel Jainkoa bertsolari entzutetsuak Legorretan zeukan tabernan erromeriak eta festak antolatzen zituela eta, garai hura gogoratzeko, Amets Artzallus eta Jon Maia bertsolariak, eta Isidro Larrañaga eta Irati Hartsuaga soinu-jotzaile tolosarrak ekarriko dituzte.
Festa Jainkoneko terrazan izango da, Olaso tabernaren aurrean, igandean 12:30ean. Olaso taberna 11:30ean irekiko dute, eta salda, mondejua eta haragi egosia zerbitzatuko dituzte.
Legorretaren 1615etiko udalerri izaera ospatzeko, margolan erakusketa jarrita daukate herriko tabernetan, hilaren hasieratik. Legorreta, zuri-beltzetik argira bilduma urriaren 30era arte ikusi ahalko da. Fernando Oliveirak eta Lorenzo Garciak margotu dituzte.
Kultur astearen barruan, hurrengo larunbatean Sagar Eguna izango da Legorretan. Aldaieta jubilatu elkarteak eta Ugaro herri eskolak antolatu dute. Sagar garraioa, prentsaketa eta muztioa ateratzea egingo dituzte, festa giroan. Auto zaharren erakusketa, eta ordenagailu zaleen Legorparty topaketa ere izango dira.
EGITARAUAK
400. urteurrena
Ugaro eskolako haurrak, atzo, Koate aldean sagarrak biltzen. Urriaren 24an ospatuko dute Sagar Eguna, muztioa ateratzeko prentsatuz./Ugaro
- Margolan erakusketa. Fernando Oliveira eta Lorenzo Garciaren lanak, herriko tabernetan. Urriaren 2tik 30era.
- Erromeria. Artzallus eta Maia bertsotan, Larrañaga eta Hartsuaga soinu jotzen. Jainkoneko terrazan, igandean 12:30ean.
- Hitzaldia. Irati Otamendiren ‘Industrializazioa Legorretan, papera baino gehiago’. Urriaren 22an, 19:30ean, udaletxean.
- Bertso saioa. Soto eta Zubeldia, Jainkoneko terrazan. Urriaren 24an, 20:00etan.
- Erakusketa. Baserriko lanabesen eta Legorretako baserrien argazkien erakusketa. Abenduaren 5etik 8ra, kiroldegian.
- Urriak 21. Pentsiodunen Elkartearen hitzaldia (17:00, udaletxean). Ibai Esoain ipuin kontalariaren ‘Bertsol Haritza’ (17:30, liburutegian; 5-11 urte). Buruhandiak (19:00). Kantu-jira (19:30).
- Urriak 22. Kantuz Giro (17:00). Buruhandiak (19:00). Industrializazioaz hitzaldia (19:30).
- Urriak 23. Pote, igel eta toka jubilatuentzat (16:30). Legorpartyren hasiera (17:00). Buruhandiak (19:00). ‘Gutako bat… edo bat gehiago?’ dokumentalaren aurkezpena Dar-Darrek (20:00, udaletxean). 21.Mus Txapelketa (23:00, Bilkoin elkartean).
- Urriak 24. Sagar Eguna: sagar garraioa Guadalupeko ermitatik plazara (11:00), Irrintzi Alai dantzak (11:30), sagar prentsaketa (11:45), sagar moten erakusketa (17:00), bigarren prentsaketa (17:30), erromeria trikitilariekin Jainkoneko terrazara (19:45), bertsolariak (20:00).
- Urriak 25. Ibilgailu klasikoen IV. topaketa: partaideen hamaiketakoa, sari ematea, bazkaria Bilkoinen (10:00-18:30, Kale Nagusian). Legorparty topaketaren bukaera (20:00).
