Springsteen ikustera, ‘autobruce’-ean
Goierriko autobus konpainiek aparteko zerbitzua eskaintzen dute: unibertsitatera, Errioxako upategietara, Realaren partidetara, sagardotegietara, Benidormera… eramaten dute jendea. Baina Goierri garaiko bizilagunek horren ohikoa ez den erabilpen bat ere ematen diete
Goierriko autobus konpainiek aparteko zerbitzua eskaintzen dute: unibertsitatera, Errioxako upategietara, Realaren partidetara, sagardotegietara, Benidormera… eramaten dute jendea. Baina Goierri garaiko bizilagunek horren ohikoa ez den erabilpen bat ere ematen diete autobusei: azken urteetan autobusak alokatzen dituzte rock kontzertuetara joateko. Asteartean bi solairuko bi autobus bete zituzten, Bruce Springsteen-en kontzertura joateko. 148 lagun joan ziren.
Egitasmo hori 2010ean jarri zuten abian. Bultzatzaileetako bat Urbe dendako Iñaki Urdangarin izan zen. «AC/DC taldeak Bilbon jo behar zuen eta bertara joatea ez da erraza. Izan ere, denok dakigu Donostiara nola joan eta non aparkatu, baina Bilbo ez dugu horren ondo ezagutzen. Kontzertu handietara joaten garen guztiok elkar ezagutzen dugu eta hiruzpalauren artean autobus bat alokatu eta Bilbora joateko deialdia zabaldu genuen».
Autobus hartan joan zirenak oso gustura itzuli ziren etxera eta hurrengo kontzertu handian autobus eske joan ziren Urdangarinengana. Ordutik, U2, Rolling Stones eta Bruce Springsteen-en kontzertuetara joan dira. «Beti bi autobus alokatzen ditugu, 100 lagunetik gora joaten baikara».
Oraingo honetan, bi solairuko bi autobruce bete dituzte. Urdangarinek giroa, beti bezala, aparta izan dela dio. «Realeko bazkidea naiz eta ederki asko dakit zein erosoa den ekitaldi handi batera autobusean joatea».
Gainera, rock zaleen autobusa futbol zaleena baino esker hobekoa da. «Kontzertuetara pozik joaten gara eta itzulera ere alaia izaten da. Realaren futbol partidetara pozik joaten gara, baina itzuli… Musika taldeen zaleak gara eta beti ondo jotzen dutela iruditzen zaigu. Ez gara kriti-koak. Beti irabazi egin dugun sentsazioarekin irteten gara Anoetatik. Realarekin ordea…».
Berriak, pozik
Pozik joan eta pozik itzuli zirenen artean, GOIERRIKO HITZAko kazetari bat zegoen: Tere Madinabeitia legazpiarra. Lehenengoz hartu zuen rock zaleen autobusa eta «luxu bat» dela esan du. «Agindutako orduan irten zen, 18:30ean, eta 19:30erako Donostian geunden. Autobusei lehentasuna eman zieten Donostiako sarreran eta, hala, autoetan joan zirenek baino denbora gutxiago behar izen genuen Anoetara heltzeko. Gainera, autobusak Anoetatik 100 metrora utzi gintuen. Autoan joanez gero, urruti aparkatu beharra duzu».
Itzulerako bidaia ere oso erosoa izan zen. «Kontzertua 00:50ean amaitu zen eta 02:00etarako herrian geunden».
