Zegamarren esker oneko herri aitormena Jabier Otaegiri

Zegamako kultur etxea 'Jabier Otaegi kultur etxea' izendatu dute

I.Gurrutxaga

2016/11/19

Jabier Otaegiren ama, alarguna eta hiru-seme alabak, gaur eguerdiko aitortza ekitaldian. Arg. I. Gurrutxaga

Joan den maiatzaren 7an Zegamako Orkatz abesbatzak eta Sant Sadurniko abesbatzak Zegamako San Martin elizan eman zuten kontzertua zuzentzen ari zela bihotzekoak jota hil zen Jabier Otaegiri esker oneko herri aitormena egin diote gaur eguerdian Zegaman. Otaegi oso pertsona maitea zen herrian, eta musikaren alde lan itzela egin zuen. Umetatik txistua jo zuen eta 14 urterekin parrokiako organoa jotzen hasi zen. Gainera, herriko txistulari taldea zuzendu zuen eta Orkatz abesbatzaren eta Tobera musika eskolaren bultzatzailea izan zen. Hiru hamarkadatan zuzendu zuen abesbatza. Bi legealditan kultura zinegotzia ere izan zen, 1991tik 1995era eta 2003tik 2007ra. Gertaera hark samin handia eragin zuen Zegaman. Sei hilabete pasatu dira harrezkero, eta Otaegiri herriaren alde egindako lan guztia eskertu nahi izan diote Zegamako Udalak, elkarteek eta hainbat herritarrek. Eliza aurreko kioskoan elkartu dira, eta ondoren kalejira egin dute Sakristauenetik familiaren etxera, eskolara eta udaletxera. Handik udaletxe aurrera joan dira, eta ekintza instituzionala egin dute. Otaegi zenaren amaren, eta haren alargun eta hiru seme-alaben aurrean, Joseba Izagirre alkateak hartu du hitza, eta adierazi du uztailaren 11n erabaki zuela udalbatzak ekitaldi hori antolatzea. Atzean zituen hainbat urtetan Zegamako udal hautetsi izan diren ordezkariak ere. Otaegiren herrigintza eta kulturgintza Izagirrek Jabier Otaegiren “herrimina eta herrigintza, kultur-mina eta kulturgintza” ekarri ditu gogora, baita Zegamarekiko izan zuen “konpromiso politikoa” ere. Bildutako guztien izenean, Iker Zubeldia bertsolariak jarritako bi bertso irakurri ditu alkateak, eta haren ondoren, oroigarri batean eman dizkie Otaegiren senideei. Segidan kultur etxearen aurreran elkartu ziren ekitaldian parte hartu dutenek, eta Zubeldiaren bi bertsoak abestu dituzte denen artean. Otaegiren amak hitza hartzeko adorea ere izan du, eta eskerrak eman dizkie inguratutako guztiei. Elena Arizkorreta alargunak eta Joseba Izagirre alkateak erakutsi dute kultur etxean jarritako plaka berria, eta ondoren, kantu saio bat egitera abiatu dira denak San Martin elizara. Bazkari batean bueltan emango diote jarraipena egunari.

Iker Zubeldiaren bertsoak Jabier Otaegiri Laino artetik zerura doa gure ahotsen norantza guk nahi baino lehen gelditu baitzen erlojuaren orratza ezpain ertzetan dastatu gendun begi umelduen gatza Jabi, handia izan zen hemen utzi zenuen lorratza harrotasunak aterako du sartu zenigun arantza eman zenigun ondarea da herrigintzaren ardatza nola Tobera musika eskola eta Orkatz abesbatza zuk sortu eta gure malkoez ureztatzen den baratza Halabeharrez ustekabean adiskide bat galtzean sentimenduak loratzen dira egoeraren beltzean ostiralero gurekin zaude kantari Kultur Etxean organu hotsak salatu zaitu berriz igande goizean txistularien goiz eresian zabiltza noraezean koru txikiko ahots eztiak entzundako bakoitzean gure kriseilu bihurtzen zera oroitzapenen leizean hamaika aldiz piztuko zera herritarren bihotzean

ELKARRIZKETAK

ERREPORTAJEAK

KIROLA

Azken bideoak

Argitalpen bereziak