Euskararen egunak kalera atera ditu gaztetxoak

Goierriko Hitza

2016/12/02

Euskararen Nazioarteko Eguna bihar bada ere, ikastetxeek egun bat aurreratu dituzte ospakizunak. Gaur, dozenaka haur eta gaztetxo atera dira kalera, kantuz eta dantzan, euskararen eguna ospatzera. Ordizian herriko bi plaza nagusiak hartu dituzte ikasleek; txikienak Barandiaran plazan elkartu dira, gaztetxoak berriz, plaza nagusian. Kantuz eta koreografiaz ondu dute saioa. Lazkaon ere, ikastolako ikasleak izan dira protagonista. Lazkao Txiki plazan hasita kantu jiran joan dira plazaraino. Udaletxeko balkoitik pregoia bota dute gazteek, eta kantuan jarraitu dute gero, ikastolako trikitilariek lagunduta. Seguran ere, kantu eta dantza artean egin dituzte Euskararen eguneko ospakizunak. Ondoren, taldeko argazkia atera dute. Itsasondon, Urkipe herri eskolakoek adierazpena irakurri dute, “euskaraz bizitzeko eskubide eta beharra” dutela azalduz. Beasaingo ikastetxeetako umeek, beraien mezuak uzten ari dira, plazapean jarritako panelean. Ikastetxe bakoitza, bere aldetik ari da euskararen eguneko ospakizunak egiten. Arratsaldean mintzodromoa eta buruhandiak izango dituzte.

Bakoitzak bere aletxoa jarriz (agiria eta egitaraua herriz herri)

Azken elkarrizketak

Azken bideoak

Argitalpen bereziak