Goierri Gorri taldeak ez dio 2017. urteari hasiera onik eman. Azken partidan berdindu eta gero, “indarberrituta” zetozen lehen taldeko neskak, baina igandean Erandiora egindako bisitan ezin izan zuten etxeko taldea mendean hartu. Bizkaitarrak sailkapenean beherago kokatuta badaude ere, 3-1 irabazi zuten, eta goierritarrengandik gertuago kokatu dira sailkapenean. Gorriak bederatzigarren daude orain, 20 punturekin.
Goierri Gorri garaipen goserik gabe atera zen, “jokorako jarrera gehiegi erakutsi gabe”. Aurreneko zatia 2-1 atzetik bukatu zuten, eta bigarrenean, etxekoek aldea handitzea lortu zuten.
Datorren asteburuan etxean jokatuko dute, eta “egoerari buelta ematen” saiatuko dira. Ez dute parean arerio erraza izango, ordea, sailkapeneko buruan dagoen Oiartzun hartuko baitute Igartzan.
Jubenilak bigarren
Jubenil mailako taldeak bestelako martxa darama. Asteburuan 3-1 irabazi zuten, eta sailkapeneko 2. postuan daude. Etxeko taldea 6. minuturako aurreratu zen, Ainhitzek falta jaurtiketa bat ongi erdiratu eta Maitanek sareetara bidali zuen baloia. Atsedenaren aurretik ordea tartea handituko zuten goierritarrek, Liernik baloia aurreratu eta Amaiak markagailura igoaz. Bueltan aldea areagotu zuen Maitanek bere kontuko bigarena eginez. Behin norgehiagoka erabakita gola Touring-ek egin zuen 20 minuturen faltan baina arazorik gabe amaitu zuen Goierri Gorrik partida.
Kadete mailan, emaitzak ez dira aldekoak izan asteburuan. Ohorezko mailan Tolosan jokatu dute gorriek. 2-1eko emaitza ekarri dute bueltan. Lehenengo mailan berriz, etxean izan dute partida. Faktore hori alde izan badute ere ez dira gai izan hiru puntuak eskuratzeko, 1-3 galdu baitute.
Gaztetxoagoetan, infantilen mailan kolpe gogorra jaso dute txapeldunen faseko partidan, Urki A taldearen aurka 15-1 galdu baitu Goierri Gorri A taldeak . Bestetik, kopako partidetan, 1-0 galdu du Goierri Gorri B-k, Amaikak Bat B-ren aurka. Azkenik aldeko emaitzarekin itzuli ziren Goierri Gorri C taldeko kideak, Urki B-ri 1-3 gailenduta.
Amaitzeko, infantilen mailan, Tolosan jokatu zuten Goierri Gorri A-koek. 4-2ko markagailuarekin itzuli ziren. Goierri Gorri B taldeak berriz, garaipen nabarmena lortu zuen Seguran; 0-6.
