Sara Zufiaurre: «Antioko Musikaldian jotzeak ilusio handia egiten digu»
Sara Zufiaurrek (Urretxu, 1981) Sariranaga boskotearekin joko du larunbat arratsaldean Antion. Talde hori Euskadiko Orkestra Sinfonikoko bost musikarik osatzen dute. asier zaldua. Nondik datorkizu musika zaletasuna? Nire amak Goiargin abesten
Sara Zufiaurrek (Urretxu, 1981) Sariranaga boskotearekin joko du larunbat arratsaldean Antion. Talde hori Euskadiko Orkestra Sinfonikoko bost musikarik osatzen dute. asier zaldua.
Nondik datorkizu musika zaletasuna?
Nire amak Goiargin abesten zuen eta kontzertuetan gainontzeko abeslarien seme-alabekin egoten nintzela gogoratzen dut. Nire ustez, hortik datorkit musika zaletasuna. Amari musika eskolara joan nahi nuela esan nion eta eraman egin ninduen.
Zergatik aukeratu zenuen klarinetea?
8 urte nituen instrumentuak aurkeztu zizkigutenean. Horretarako, ikasle orkestra bat deitu zuten. Nikolas Elgeak klarinetea aurkeztu zuen eta nik instrumentu hori aukeratu nuen. Baserrian trikitixa aukeratzeko esan zidaten, baina nik klarinetea nahi nuela esan nien.
Zer moduz ikasketak?
Klarinete ikasketak zortzi urtekoak dira. Nire irakaslea Juan Navarro izan zen, Euskadiko Orkestrako solista. Zorte handia izan nuen, hasiera-hasieratik oso irakasle ona izan bainuen. Ondoren, musika irakasle izateko ikasi nuen, ez bainuen aterik itxi nahi: musikari profesionala izan nahi nuen, baina banekien zaila zela. Bi urte Bilbotik Donostiara eman nituen: Unibertsitatetik kontserbatoriora.
Zer egin zenuen ikasketak bukatu ondoren?
Ikasketak 22 urterekin bukatu nituen eta Iruñera joan nintzen lanera. Bi urte eman nituen Barañaingo musika eskolan, klarinete irakasle lanetan. Garai hartan Iruñeko bandan, Nafarroako Orkestran eta Euskadiko Orkestran kolaboratzaile izan nintzen. Asko ikasi eta gozatu nuen.
Noiz lortu zenuen Euskadiko Orkestrako plaza?
Duela hamar urte. Lehiaketa deitu zuten eta curriculuma bidali nuen. Mundu osoko 90 lagun aurkeztu ginen eta 40 aukeratu zituzten probak egiteko. Laugarren errondara Burgosko musikari bat eta ni heldu ginen. Biok kolaboratzaileak ginen, ezagunak. Plaza lortu nuela esan zidatenean, sekulako poza hartu nuen. Ezin nuen sinetsi.
Nolakoak izan dira azken hamar urte hauek?
Oso onak. Agertokira igo eta jotzea plazer bat da. Asko gozatzen dut.
Zenbat emanaldi egiten dituzue urtean?
Asko. 55 emanaldi finko ditugu eta hiru opera ere egiten ditugu. Uda honetan Figaroren ezkontzak egin dugu eta oso kritika onak jaso ditu. Gainera, Fernando Velazquez bilbotarrak pelikula baterako konposatu duen musika grabatu dugu. Oso gauza politak egiten ari gara. Euskadiko Orkestrak oso maila ona du. Zuzendari berria dugu, Robert Treviño estatubatuarra, eta asko bidaiatu behar dugula esan digute. Orkestraren proiekzioa dute helburu. Bestalde, jende asko ari da jubilatzen eta gazte asko ari dira sartzen.
Orkestra handi batean jotzea oso aberasgarria izango da.
Hala da. Euskadiko Orkestran mundu osoko jendeak jotzen du: Italia, Errusia, Frantzia, Polonia, Suitza… %25 bakarrik gara euskaldunak. Musikari gehienak Donostiatik gertu bizi dira. Senarra eta biok urrutien bizi direnen artean gaude.
Zeintzuk izango dira zuen hurrengo emanaldiak?
Larunbat eguerdian Donostiako Zinemaldian joko dugu, belodromoan. Bestalde, Tabakaleran eta Bilbon opera bat egin behar dugu. Hor ez dut nik joko. Gero, Bordelera (Frantzia) joango gara. Handik itzulitakoan Mahler-en lehenengo sinfonia joko dugu. Azaroan opera egingo dugu Bilbon eta abenduan Donostiako Orfeoiarekin joko dugu.
Hori guztia baino lehenago Zumarragan jo behar duzu Sariranaga taldearekin.
Euskadiko Orkestrak larunbat goizetan matinee-ak egiten ditu, bere egoitzan bertan. Orkestrako kideok taldetxoak osatzen ditugu, programa bat aurkezten dugu eta batzorde batek aukeraketa egiten du. Orkestrako kide batek Brahms-en boskotea jo nahi zuela esan zidan eta bere proposamena aukeratu egin zuten. Maiatzean jo genuen eta handik hiru egunera Zumarragako kultur etxetik deitu ziguten. Ilusio handia egin zidan. Antion jotzeko gogo handia nuen. Gainera, askotan lehen emanaldian ez zara gustura gelditzen. Antiora programa borobilduagoa eramango dugu.
Zer esan diezu taldekideei Antiori buruz?
Taldekide guztiek ezagutzen dute Antio, Euskadiko Orkestran plaza lortu berri duen Pawel Krymer poloniarrak ez ezik. Badakite toki zoragarria dela eta akustika bikaina duela. Gainera, Antioko Musikaldia oso garrantzitsua da.
