Ataunen Mitoaldia egitarauan bilduko dituzte mitologiari buruzko ekitaldi ugari, urriaren 30etik azaroaren 4ra
Ataunen I. Mitoaldia antolatu dute Jentilbaratza elkarteak eta Gipuzkoako Parketxe Sareak. Mitoak, legendak eta kondairak azaltzetik harago, horien bidez iritsi den kristautasunaren aurreko gizartearen nolakotasuna ere erakutsi nahi dute. Urriaren 30ean hasiko da astebeteko egitaraua. Ikastetxeek Barandiaran Museoan tailerrak egin ahalko dituzte, astelehenetik ostiralera. Ipuin kontaketak, hitzaldiak eta Jentilen Etorrera antzerkia izango dira beste saioak.
Ataun Euskal Herriko mitologiaren erreferentzia nagusi izan dadin lortu nahi dute bi eragileek, gaur goizeko aurkezpenean Donostian esan dutenez. Mitoaldiak jarraipena izango duela iradoki dute, eta mundu mitologikoaren hedapenean tresna “garrantzitsua” izango dela. Bestetik, Ataunen garatzen duten lankidetza Euskal Herri osora zabaltzeko asmoa ere erakutsi dute, mitologiaren gaia lantzen ari diren beste elkarte, erakunde eta herriei bidea irekita.
I. Mitoaldiaren egitaraua:
Mitoaldiaren lehenengo aldiaren aurkezpena, gaur, Donostian. Akerbeltz, Torto, Samartintxiki eta pregoilaria ere joan dira./Aimar Maiz
- Urriaren 30etik azaroaren 3ra, astelehenetik ostiralera. Ikastetxeetako taldeentzat tailerrak, Barandiaran Museoan. Jolasak, antzerkiak, ariketa teoriko eta praktikoak. Lekua badago oraindik (943 18 03 35, barandiaran@gipuzkoamendizmendi.net)
- Azaroak 1, asteazkena. Marimunduko eta beste izaki mitologiko batzuekin ipuin kontaketa, Barandiaran Museoan. Bi saio: 11:00etan eta 12:30ean. Sarrera: 2,50. Aurrez eman behar da izena.
- Azaroak 3, ostirala. Toti Martinez de Lezearen ‘Mitologiaren bidezidorretatik’ hitzaldia, euskaraz, Barandiaran Museoan, 19:00etan. Doan da, baina tokia erreserbatu behar da aurrez.
- Azaroak 4, larunbata. Jentilen Etorrera antzezpena. 18:15ean ongietorria San Martingo plazan; ondoren, ibilaldia Auzoeta kiroldegiraino. Bi antzezpen egingo dituzte Jentilbaratza elkartekoek, 19:00etan eta 21:00etan. Sarrera doan da, baina txartelak hartu behar dira (aldez aurretik jentilenetorrera.com webgunean, eta arratsaldean bertan herriko bi tokitan).
