Ixabel Olano Segurola plaza

Goierriko Hitza

2017/10/29

Ixabel Olano Segurola plaza

Beasaingo Karobi kalearen ondoan, Seaska haur-eskolaren atzean dagoen parkeak Beasaingo ikastolak izandako lehen andereñoaren izena du gaur eguerdiaz geroztik: Ixabel Olano Segurola plaza. Berdintasun irizpideak jarraituz, izen ofizialik ez duten guneak izendatzeari ekin dio Udalak eta horiek horrela, aipatu eremu publikoari herriko emakume, andereño eta Beasainen euskararen sustatzaile nagusienetako bat izan den herritar ezagunaren izena jartzea onartu zuen ostegunean udalbatzak, aho batez. Gaur egurdian, Ixabel Olano Segurolaren familia, udal ordezkariak eta herritarrak bertan zirela, aurrekuskuaren dantzarekin inauguratuta geratu da Ixabel Olano Segurola plaza. Aitor Aldasoro alkateak ekitaldiaren aurkezpenean esan duenez, emakume “eredugarria” izan zen Ixabel Olano Segurola, emakumearen eta euskararen arloan, eta horrekin batera, “hitz gutxirekin gauza asko esaten zituena”. Beasaingo Ikastolako lehenengo andereñoa izan zen Olano; 1965eko urtarrilaren 7an, 23 ikaslerekin jarri zuen martxan ikastola. 25 urtez jardun zuen bertan, harik eta 1990ean erretiroa hartu zuen arte. Aurtengo urtarrilean hil zen 91 urte zituela.

Azken elkarrizketak

Azken bideoak

Argitalpen bereziak