Lierni Lekuona eta Aitor Hernandez izan dira onenak Urtatzazarreko ziklo-kros proban

Telleriarteko Txirrindulari Elkarteak antolatutako ziklo-krosak zazpigarren ekitaldia izan du gaurkoa eta 300 bat txirrindularik parte hartu dute

Goierriko Hitza

Legazpi

2017/11/01

Aitor Hernandez irabazlea

Gaur goizetik eguerdira arte Legazpiko VII. Ziklo-krosa jokatu da Urtatzazarreko zelaietan. Telleriarteko Txirrindulari Elkarteko kideek eurek mendian bizikletan ibiltzea gustukoa zutelako antolatu zuten ziklo-krosa orain zazpi urte eta honezkero Euskal Herriko zirkuituaren geldialdietako bat da. Horren isla da gaur 300 bat txirrindularik erantzun diotela legazpikoek jarritako hitzorduari. Elite mailan nesketan Lierni Lekuonak irabazi du eta mutiletan Aitor Hernandez. Hernandez laugarren aldiz igo da Urtatzazarreko podiumera. Irabazleak azaldu duenez, “Legazpiko ziklo-krosak garai batekoen antza dauka, zirkuitu gogorra da, garai batekoen modukoa da, autentikoa”. Hernandezek berak halakoak gustuko dituela eta aurten ibilbideari egin dizkioten aldaketek zirkuitua gehiago gogortu dutela ere gehitu du. Legazpiarrik ere egon da lasterketan. Lau txirrindulari legazpiar igo dira podiumera. Ander Ormazabal kadetea izan da gazteena, berak lehenengo aldiz parte hartu du. Oscar Gonzalezek Master 30en mailan aritu da. Aitor Zabaleta, Txipi, Master 50ean eta Ander Ibarguren elite mailan, Ibargurenek urteor parte hartu du Legazpiko Ziklo-krosean. Denek esan dute aho batez animo asko jaso dituztela herrikideen aldetik eta Legazpin bertan aritzeak urduriago jartzen dituela, herrian bertan arituz gero erantzukizuna dela gutxieneko maila ematea. Gustura agertu dira lauak egindako lanarekin.

Azken elkarrizketak

Azken bideoak

Argitalpen bereziak