Ordu eta erdian bukatu dira Goierriko 2 Handiak traileko dortsalak
515 lagunek har dezakete parte 88 kilometroko lasterketan. 17:00etan ireki da Ehunmilak, G2H eta Marimurumendin izena emateko epea.
Marka guztiak hautsiz jarri da martxan IX. Ehunmilak ultra trail. Gaur arratsaldean, 17:00etan, izena emateko epea ireki, eta ordu eta erdian, Goierriko 2 Handiak (88 kilometro) lasterketarako 515 laguneko muga bete da; itxaron zerrenda dago irekita. Iaz, 28 orduan bukatu ziren dortsal guztiak.
Gainerako bi lasterketetan izena emateko aukera dago oraindik. Ehunmilak ultra trailean (168 kilometro) 515 korrikalarirentzako dortsalak daude eta Marimurumendi maratoirako (42 kilometro) 265.
Uztailaren 13an, 14an eta 15ean jokatuko dira hiru lasterketak Gipuzkoako eta Goierriko mendietan barrena, Beasaindik abiatuta.
