Iztuetarekin kantu kontari

Goierriko Hitza

2017/11/18

Zaldibiako Txanbolinteroak txistulari taldeko eta Ordiziako Musika Eskolako Zaldibiako ikasleak, Iztuetaren jaiotetxearen aurrean.

Juan Inazio Iztueta Etxeberria dantzari eta koreologo zaldibiarraren (1767-1845) jaiotzaren 250. urteurrenaren harira, Iztuetaren testuen irakurketa ibiltaria egin dute gaur eguerdian Zaldibian, Iztueta elkarteak sustatuta. Mugertza baserritik hasita, eta Zubiondo-Zubiaurren, plazan eta Madalenanen geldialdiak eginez, Txamarretxe plazan –han dago Iztuetaren jaiotetxea, Kanpaindegi– amaitu dute irakurraldia, Iztuetak Kontxesiri eskainitako bertsoak kantatuz. Iztuetak idatzitako Gipuzcoaco Provinciaren Condaira (1847. urtean argitaratua) liburuko bost testu irakurri dituzte. Mugertzan, Gipuzkoako lurraren aberastasuna; Zubiaurren, Zaldibiako iturriak; plazan, Gure hizkuntza; Madalenean, Azienda beltzak; eta Txamarretxen, Aberetxea, Geria edo Ardi-elia. Ibilbidean zehar, Zaldibiako Txanbolinteroak txistulari taldeak eta Ordiziako Musika Eskolako Zaldibiako ikasleek haien saioak egin dituzte. Gaur, 18:30ean, atzoko eta gaurko Zaldibiako dantzariek emanaldia egingo dute Resti pilotalekuan.

IZTUETAREN JAIOTZAREN 250. URTEURRENA. EGITARAUA · Gaur. Zaldibiako lehengo eta oraingo dantzarien saioa, 18:30ean, Resti pilotalekuan. · Azaroak 23. Gerardo Elortzaren hitzaldia: Iztuetaren garaiak eta lanak. 18:30ean, kultur etxean. · Azaroak 26. Dantzen erakustaldia. Donostiako Udal Txistulari Taldea, Zaldibiko txistulariak eta Gipuzkoako hainbat dantza talde, 12:00etan, plazan. · Azaroak 29. Iztuetari omenaldia eginez, dantza saioak Gipuzkoako hainbat herritan, 18:30ean. · Azaroaren 29ra arte. Iztuetari buruzko erakusketa, Karreane kultur etxean, 17:00etatik 19:30era. Larunbatetan eta igandeetan, 10:00etatik 12:00etara.

Azken elkarrizketak

Azken bideoak

Argitalpen bereziak