Goierriko zerbitzuen gida berria
GOIERRIKO HITZA egunkariaren eta Goiberri aldizkariaren harpideak datozen egunetan hasiko dira gida berritua jasotzen etxeko postontzian. Orain artean kaleratutako gidarik osatuena da.
Goierriko zerbitzuen gidak 2013 eta 2015 urteetan izan zuen harrera ona ikusita, hirugarren alea kaleratu berri dute Goierriko Hedabideek, bi urtez behingo maiztasunari eutsiz. Gida eguneratuta dago, bai diseinuz bai edukiz, eta orain arte egin den osoena da. GOIERRIKO HITZA egunkariaren eta GoiBerri aldizkarien harpideek datozen egunetan jasoko dute gida berritua etxeko postontzian. Leku publikoetan ere eskuragarri egongo da Goierri osoa aintzat hartzen duen euskarazko gida bakarra.
Goierriko 23 udalerrietan alor, esparru eta sektore ezberdinetan dauden zerbitzuak irakurlearen esku jarri dira goierrikozerbitzuak.eus gidan, atalka eta herrika banatuta. Beste inora jo izan beharrik gabe, bailarako zerbitzu eskaintzarik zabalena aurkituko du irakurleak.
Bederatzi ataletan
Puzzleen piezak gogora ekarriz osatu da diseinu berria, ikono eta irudi deigarriak erabiliz, bederatzi ataletan banatuta. Pieza bakoitzak bere kolorea du, modu argian, bilatzen dena begiratu bakarrean aurkitzeko moduan. Atalak honakoak dira: Dendak, Edergintza, Enpresak eta zerbitzuak, Erakundeak, Etxegintza, Motorra, Osasuna eta Ostalaritza. Argitalpen berriak 128 orrialde ditu, eta koloretan inprimatu da oso-osorik. Paperean zein formatu digitalean orain arte ematen den eskaintza osatzeko bokazioa du gida berriak.
Webgune berritua, laster
Eta papereko argitalpena berritzearekin bat, webgune berria ere datozen egunetan egongo da kontsultatzeko moduan. Garai berrietara egokitzeko etengabeko ahalegina norabidetzat hartuta, paperekoari lotutako itxura berria izango du goierrikozerbitzuak.eus atari digitalak. Sakelakoetara eta gainontzeko gailu eramangarrietara egokituko da.
Webguneetan azalak duen garrantziaz jakitun, erabilerraztasuna, argitasuna eta egokitzapena izango ditu ardatz. Gainaldean bederatzi atalen menua dakar, eta erdi-erdian, udalerri bakoitzeko zerbitzu guztiak erraz aurki daitezkeen mapa bat.
Bilatzaileari aparteko garrantzia eman zaio webgunea berritzeko garaian, erabiltzaileak erraz eta azkar bilatu dezan aurkitu nahi duena. Atari digitala etengabe eguneratuko da. 
