Beste 48 familia liburura
Zaldibiako Iztueta kultur elkarteak osatu du herriko familia eta etxeen bilduma. 2014an ateratako karpetak 71 fitxa zeuzkan, eta orain 48 gehiago argitaratu ditu. Bukatutzat eman dute bilketa
Zaldibiako 119 familiaren jatorria, osaera eta informazio jakingarriena biltzen duen liburua osatu du Iztueta Kultur Elkarteak. Bi kolpetan argitaratu dute; 2014an 71 fitxa, sendi banarenak; eta orain beste 48renak. Uztaidun karpeta bildumagarria osatu dute hala, eta proiektua bukatutzat jo dute.
Ardiki Egunean aurkeztu zuten herrian bigarren emanaldia, eta harrezkero zabaltzen ari dira. Liburua Zaldibiako etxe guztietara doan banatu dute, eta gainerakoak 15 euroan salgai dira. Paperekoaz gain, informazio guztia webgunean jarri dute (iztueta.com).
Etxeetara joan eta sendien informazioa jasotzen, landa-lan handia du liburuak. Aurrez zehaztutako galdetegi batekin galderak egin eta audioa grabatu diete, baita argazkiak eskatu ere.
«Familia bakoitzak eman nahi izan duen informazioa bildu da. Xumetasun horretatik dago egina, eta horixe zuen helburua: XX. mendean Zaldibiako etxeak eta familiak deskribatzea, eta beraien bizimoldea eta ohiturak jasotzea. Liburu erraza eta atsegina da, argazki askokoa, eta oso hurbilekoa», laburbildu du proiektua Malores Etxeberriak.
Bederatzi auzotakoak
Zaldibiako 9 auzotan banatuta bildu dituzte familiak: Aiestaran, Arruegi, Egileor, Elbarrena, kale etxeak, Olaeta, Urreta, Urtesabel eta Urtsuerreka. Sendi bakoitzari fitxa bana eman diote, orri batekoa. Etxearen, inguruko paraje-izenen eta familiaren berri idatzi dute. Atzean, pasadizoak edo bitxikeriak jaso dituzte.
Iztueta elkartekoak 2011n hasi ziren, boluntario lanean. 
