Bi emanaldi egingo dituzte Majori kiroldegian, 16:00etan eta 18:30ean. Sarrerekin eskuratutako dirua Seaskarentzat izango da. 'Borobilean' da ikuskizunaren izenburua
Abenduaren 23an, larunbatean, Ordizian izango dira Pirritx, Porrotx eta Marimotots, Borobilean ikuskizunarekin, Goierriko ume eta hain ume ez direnei, irribarre bat ateratzeko. Majori kiroldegian izango da hitzordua eta bi saio egingo dituzte. Sarrerekin eskuratutako dirua, Seaskarentzat, Iparraldeko ikastolentzat izango da. Ordiziako Jakintza ikastolak, Lazkaoko San Benito ikastolak eta Beasaingo Andramendi ikastolak antolatu dute saioa, beste urteetan bezala. Aurkezpena, atzo arratsaldean egin zuten Ordiziako Barrena kultur etxean eta bertan izan ziren, Porrotx pailazoa, antolakuntzako ordezkariak eta baita Urruña eta Zubiruko (Lapurdi) ikastoletako ordezkariak ere.
Aurreko urteen tankeran, bi emanaldi egingo dituzte; 16:00etan bata eta 18:30ean bestea, larunbatean biak. Zazpi euro balio du sarrerak eta Goierriko hainbat herritan jarriko dituzte bihartik aurrera salgai; Ordizian, Lazkaon, Beasainen, Seguran, Itsasondon, Zaldibian eta Idiazabalen. Entzumen arazoak dituztenentzat bukle magnetikoa jarriko dute aurten.
Elkarlana
Goierriko, Ziburuko eta Urruñako ikastolek elkarlana hasi zutela 21 urte igaro dira jada eta horren adibide garbia da abenduaren 23an egingo den pailazoen emanaldia. Urruñako ikastola eta Ziburuko Piarres Larzabal kolegioak, zerotik hasitako ikastolak dira eta azken urteotan urrats nabarmenak egin dituzten arren, behar handiak dituzte oraindik. Oraintxe, hornikuntza lanetan murgilduta daude.
Ikuskizun berria
Borobilean izena du Pirrix, Porrotx eta Marimotsen ikuskizun berriak, eta urteurren borobil batekin batera dator; izan ere, pailazoek 30 urte daramatzate eskenatokietan. Beste esanahi bat ere badu izenburuak; izan ere, pailazoak borobilean eseriko dira, «begiak eta bihotzak elkarri begira». Arauen, antolaketaren eta norbere lekua bilatzearen inguruko gogoeta da Pirritx, Porrotx eta Marimotots pailazoek dakartena. Hala, etxean, eskolan, kalean edo lagunartean dauden arauen eta antolatzeko moduen inguruko gogoeta egingo dute. Minak eta desirak nola kontatu, errespetua landu eta erabakiak nola hartu landuko dute. Borobilean izenburupean, ikuskizunaz gain disko-liburua eta ipuinak ere argitaratuko dituzte.
Pailazoen saioa
Sarrerak salgai
· Ordizia. Bihar eta etzi, Villa Eugenian eta Majorin, 17:00etatik 18:30era. Ondoren, agortu arte, Majorin.
· Lazkao. Gerriko liburudendan.
· Beasain. Bihar eta etzi, Andramendi ikastolan. Ondoren, Antzizar tabernan.
· Segura. Elorripe tabernan.
· Itsasondo. Kaxintanen.
· Zaldibia. Joxepane tabernan.
· Idiazabal. Izparren.
