Mundua geldiarazi, aldatzeko
Munduko 177 herrialdetan emakumezkoen nazioarteko greba egingo dute Martxoaren 8an. Goierrin ekitaldi ugari egingo dituzte; ostegunean Ordizian eskualdeko elkarretaratzea dago
Aurtengo Martxoaren 8a, Emakumezkoen Nazioarteko Egun berezia izango da, mundu mailako greba antolatu baitute mugimendu feministek. Iaz, munduko 70 herrialde baino gehiagotan emakumezkoen grebarako deialdia zabaldu zuten, «emakumeen kontra indarkeria eta desberdintasun molde ugari eragiten dituen munduaren aurrean»; aurten, berriz, mundu mailako 177 herrialdetan bat egingo dute Emakumeok planto aldarrikapenarekin eta grebarekin.
Euskal Herriko mugimendu feministak eta ELA, LAB, ESK, Steilas, EHNE eta Hiru sindikatuek ere babesten dute greba: «Mundua geratuko dugu, mundua aldatzeko. Emakume guztiok planto egin dezagula eta munduari, gobernuei eta gizarteari erakuts diezaiogula ezinbestekoak garela».
Goierriko herrietan ekitaldi ugari antolatu dituzte Martxoaren 8a ospatzeko eta grebaren eskaerak aldarrikatzeko. Beasain, Ordizia, Itsasondo eta Legorretan, esate baterako, elkarlanean aritu dira emakume plataformak eta ostegunean, 12:00etatik 12:15era elkarretaratzea egingo dute Goierriko emakumeek Ordiziako plazan: «Emakumeen aurkako indarkeria, lan baldintza prekarioak, soldata arteko ezberdintasuna edo egiten dugun ezkutuko zaintza lanak salatzeko egingo da elkarretaratzea».
Izan ere, Ataungo emaku-meen oharrak dioenaren arabera, «greba egiteko eta gauzak aldatzeko hamaika arrazoi» daude. Batetik, «eredu ekonomiko honek zapaltzen gaituelako»; bestetik, «indarkeria matxistak jipoitzen gaituelako eta arrazakeriak akabatzen gaituelako»; eta azkenik, «kultura patriarkalak baztertu, objektu bihurtu eta estereotipatzen gaituelako».
Greba lau arlotan
Lehenbiziko aldia da Euskal Herrian propio emakumeentzako greba bat egiten dena, eta ez da ohiko lan arloko «greba tradizional» bat izango. Beasain , Ordizia, Itsasondo eta Legorretako emakumeek prentsa agerraldian adierazitakoaren arabera, «emakumeak erdigunean gauden espazio pribatu eta publikoko esfera guztiak hartzen ditu aintzat». Honela, zaintza greba, kontsumo greba, enplegu greba eta hezkuntza greba deitu dituzte. Zaintza grebarekin, «emakumeok egiten dugun zaintza lanik gabe, sistemak ez lukeela funtzionatuko erakustarazi nahi dugu, lan ikusezin eta baliogabetua da». Kontsumoaren grebarekin, berriz, Martxoaren 8an ez kontsumitzea nahi dute, «guk kontsumitu ezean, merkatuak hutsik geratzen direlako».
Enpleguaren arloko greba azkenik, «ordainpeko lana ez egi-tean datza, eredu ekonomiko honek zapaltzen gaituelako, sistema. honek sexuaren araberako lan banaketa bultzatzen duelako, eta ezkutatzen eta gutxiesten ditu feminizatutako ogibideak, bai iraunkortasunarekin eta zaintzarekin lotutako lanak». Irakaskuntzan, azkenik, «hezkuntzan desberdintasunak eguneroko arazo direlako».
Besoko morea
Ostegunean lanuztea egitearekin batera, grebaren aldarrikapenekin bat egiteko modu bat baino gehiago dago. Besoko morea janztea eta etxeko balkoietan eta leihoetan amantalak, erratzak, baldeak… zintzilikatzea. Gaur Beasainen eta Itsasondon, eta bihar Ordizian, besoko mo-reak banatuko dituzte grebaren informazioarekin batera.
Emakume gisa identifikatzen diren guztientzako greba da, baina horrek ez du esan nahi gizonek ezin dutenik parte hartu. Ondoko zutabean daude feminista taldeek gizonezkoei emandako gomendioak.
Planto egiteko moduak
Martxoaren 8ko greba feministarekin bat egiteko modu asko dute emakumezkoek zein gizonezkoek. Emakumezkoak · Lantokietan eta ikastetxeetan. Lanuzteetara batuz. · Mobilizazioetara joanez. Herrian antolatutako mobilizazioetan parte hartuz. · Balkoitik zintzilik. Mantalak edota beste edozein etxeko tresna balkoitik eskegiz zaintza lanak azaleratzeko. · Kontsumitzeari utziz. Merkatuan kontsumitzeari utziz, «batez ere langileen esplotazioaren ikur diren enpresa handietan, objetutzat hartzen gaituztenak». · Zaintzeari utziz, lan hori besteemakumeen esku utzi gabe. · Besoko morea. Besoko morea jantziz. Gizonezkoek · Aitak. Seme-alabetaz arduratu. · Lagunak. Lagunen umeak zaindu ditzakezu. · Laneko lagunak. Emakume langileen lana egiteko eskaini zure burua. · Laneko nagusiak. Enpresan lan egiten duten emakumeei elkartasuna adierazi eta errepresioa, trabak eta arazoak saihestu. · Eskolako kideak. Eskolara joan behar ez duten kideak eta haien lanuztea babestu. · Irakasleak. Martxoaren 8an zerrendarik ez pasatu. Gogoratu ikasleen hutsegitea justifikatuta dagoela: kalean daude Gu hiltzen ari dira garraxika eta bizi nahi dugu aldarrikatzen. · Langileak. Utzi egun horretako lan guztiak eta atera zaitez kalera «bizitzaren» alde. · Familian zaintza behar duenik badago, has zaitez egun horretatik aurrera ohituraz emaku-meok betetzen dugun lan horretan pausuak ematen. · Komunikabideak. Komunikabideetan lan egiten dutenek, bere esku dagoen guztia egin emakumeek eman dezaten egun horretako berriak.
Emakumeen Etxera bisitak
Goierri garaiko Emakumeen Etxea Urretxuko haur eskola izandakoan egongo da . Martxoaren 16an bailarako taldeen bisitak hasiko dira etxea «eraikitzeko» Goierri garaiko udalerrietan antolatu dituzten ekintzen artean, nabarmentzekoa da Emakumeen Etxea Eraikitzen deitutakoa. Martxoaren 16an hasiko dira bisitak Urretxuko haurtzaindegia izandakoan kokatuko duten Emakumeen Etxera. Bisitetan bailarako gizarte eragileek parte hartuko dute. Lehenengo urratsa da, ondoren edukiak nola espazioak definitzen hasiko dira. Izan ere, Urola Garaiako Berdintasun Arlotik adierazi dutenez, «Emakumeen Etxea guztion artean eraikiko dugu prozesu parte hartzaile baten bitartez». Emakumeen Etxearen proiektua 2017-2019ko bailarako Berdintasun Planaren barruko proiektu estrategikoetako bat da, «elkartzeko gune bat izango da, norberaren gela bailarako emakume guztientzat». Bailara mailan, Berdintasun Arloak, ikastetxeekin elkarla-nean beste ekintza bat antolatu du. Hain zuzen, «berdintasuna ikasi ere egiten denaren kontziente», M8 logoa duen panela osatzeko gonbita luzatu diete ikasleei. Ekimenaren funtsa da Emakumearen Nazioarteko Egunaren harira ikastetxe bakoitzean landutakoa panelera ekartzea. Bildutako ekarpenak argazkiak, esaldiak, Interneten bilatutako irudiak, egunkari zein aldizkarietako argazkiak, marrazkiak edo lemak izan daitezke. Berdintasun Arlotik adierazi dutenez, «ahal den neurrian biltzen den material horretan guztian familien inplikazioa ere lortu nahi dugu, haiei parte hartzeko eskatuz». Oraindik ez dute tokia zehaztu, baina ikastetxeetan osatzen diren panelak ikusgai jarriko dituzte bailarako guneren batean.
