Aizkorri Mendizale Elkarteak antolatuta, IX. Tomas Salazar Aizkorriko Bira mendi ibilaldia egingo dute aurten. Orain arte igandez egin izan dute proba, baina aurten larunbatez izango da, ekainaren 2an. Dagoeneko zabaldu dute izena emateko epea.
Aizkorriko Bira 2002. urtean egin zuten aurrenekoz, eta harrezkero, bi urtez behin egiten dute. Aurten egunez aldatzea erabaki badute ere, ordutegia eta ibilbidea mantendu egingoko dituzte. Euskal Herriko iraupen luzeko frogen zirkuitoan sartu dute proba.
Helduen ibilaldiarekin batera, Gazteen III. Bira ere egingo dute. Izan ere, gaztetxoen artean “mendizaletasuna sustatzea” da Aizkorri Mendizale Elkartearen helburuetako bat. Haur eta gazteentzako marrazki lehiaketa ere egin zuten azken edizioan, eta “izandako arrakasta ikusita”, aurten ere antolatuko dute.
Izen-ematea:
Helduen proban izena emateko hainbat bide jarri dituzte. Aizkorriko Biraren webgunean edota mendi martxen zirkuitoaren atarian apuntatu daiteke. Antolatzaileekin harremanetan jartzeko berriz, tsaizkorrikobira@gmail.com helbide elektronikora idatzi behar da.
Gazteen Biran izena emateko berriz, ikastetxeen bidez zabalduko dute informazioa, eta irteera Eskola Kiroleko egutegian sartuko dute.
