Badatoz Ezkioko festak
Gaur hasiko dira Ezkioko San Migel jaiak. Mieltxoren jaitsiera 19:00etan izango da gaur. Argindegi ostatuan Reggae DJ Gaua egingo dute bihar eta 04:00etan baratxuri zopa banatuko dute
Ezkioko jaiak hasiko dira gaur. Herri mailan jokatu duten pilota txapelketako finalak izango dira jaietako egitarauaren lehenengo geldialdia, hain zuzen 17:00etan jokatuko dira frontoian finalak. Ondoren, 19:00etan Mieltxoren jaitsiera egingo dute.
Gauez mus txapelketa jokatuko dute. 22:00etan hasiko bada ere, izen-ematea 21:30ean hasiko da; bikoteko 20 euro ordainduta, sariak jasotako diruarekin banatuko dituzte. Irabazleek bildutakoaren %40, bigarrenek %30 eta hirugarrenek %20. Irabazleek bi txuleta ere jasoko dituzte. Gaurko egunari amaiera emateko karaokea egingo dute.
Bihar 13:00etan toka txapelketa izango da eta 14:30ean herri bazkaria. Bazkaria frontoian egingo dute eta Agustin Elorza eta Iñaki Larrañaga trikitilariek alaituko dute. Jarraian, 17:00etan ume jolasak izango dira eta Ezkiotik Santa Marina bitarteko bidea itxita izango da 19:00ak arte. Iluntzean txokolate jana egingo dute, 19:00etan eta 22:00etan Trikuarri taldearen kontzertua dago. 04:00etan baratxuri zopa banatuko dute. Argindegi ostatuan, 23:00etan hasita, Reggae DJ Gaua dago. Aiaraldeko Soinu Sistema elkarteko bi gaztek musika jarriko dute eta DJ Jond! eta R-Kanuto ere arituko dira 05:00ak arte.
Izazpiko Igoera
Etzi, igandea, 11:00etan haurren eta gaztetxoen lasterketa izango da eta 11:30ean Izazpiko Igoera egingo dute. Arratsaldean, 18:30ean, herri-kirol jardunaldia izango da herritarrek parte hartuta. Ondoren, barrikotea eta taloak, 19:00etan.
San Migel egunera arte jaien ospakizunak etengo dira Ezkion, maiatzaren 8an, asteartean, berriro ekiteko. San Migel eguna izanik, meza egingo dute 12:00etan eta ondoren mokadutxoa izango da. Arratsaldean jai giroa berreskuratu eta 17:00etan Mamuak eta beste auzokide batzuk ipuin kontaketa eskainiko du Nerea Ariznabarreta ipuin kontalariak; 3 eta 10 urte bitarteko haurrei zuzenduta dago. Amaitzeko, trikitilariak eta Maialen Akizu eta Beñat Torres bertsolariak izango dira. 
