Laura Orgué: «Ohituta nagoen distantzia baino luzeagoa du maratoiak»
Laura Orgué kataluniarra iaz, Zegamako Kilometro Bertikalean // Argazkia: Igor Quijano
Kanpoko jende asko gerturatzen da Zegamara egun hauetan. Ibilbideaz harago, ba al du zerbait berezia? Noski! Nik maratoiko ibilbidea ezagutu ere ez dut egiten, baina gehienbat bertako giroa nabarmenduko nuke. Esan didatenaren arabera ibilbideko zati batzuetan zaleek ia bultza ere egiten dute. Beraz, inguruaz gain, herrian bertan lasterketa nola bizi den zoragarria da. Mendi korrikalariok ibilbidearen zati handiena bakarrik egiten ohituta gaude eta lasterketa batzuetan zaleak badaude ere, ez da ohikoena. Hemen hori ere berezia da, fama oso ona du. Aurkari nortzuk izango diren begiratu al duzu? Niri neure buruarekin lehiatzea gustatzen zait lehenik eta behin. Unean uneko gorputzaldiari errendimendurik onena ateratzea izaten dut helburu, eta aurrez entrenamenduetan ikusi dudana eta hobetu dudana aplikatu. Argi dagoena da, behin lasterketan izena emanda, gure buruarekin lehiatzeaz gain gainontzeko parte hartzaileekin ere borrokatzen dugula. Ez naiz begira aritzen den horietakoa, baina batekin eta bestearekin hitz eginez, oharkabean badakigu gutxi asko nor etorriko garen. Lasterketa irabazteko faboritoren baten izena aurreratzen ausartzen al zara? Ez, denboraldi hasiera da gainera, eta honelako probetan, lehena askorentzat. Horrek bereziago ere egiten du maratoia, elkarren aurka lehenengoz hemen lehiatuko garelako asko. Eguraldiak eragina izan ohi du lasterketan zehar ezta? Noski. Aurrez lokatza izatea ohikoa da, baina egunean bertan euria ari badu proba asko gogortuko da eta aintzat hartzeko faktore garrantzitsua izango da gainera. Badira urteak hotzez korrikalari asko gelditu eta laguntza jaso behar izan dutenak, beraz norberak atera beharko dio horri zukua. Aurreko urteekin alderatuz, esperientzia gogorragoa espero al duzu? Esfortzua desberdina den unetik, esperientzia bera ere aldatzen da. Norberak bere ezaugarriak ditu eta probara egokitzea da garrantzitsuena.Bada jendea esaterako, kilometro bertikala bezalako lan motz baina intentsitate handikoetara gaizki moldatzen dena; eta alderantziz ere bai, denborari dagokionez esfortzu labur eta muturrekoak ondo gauzatzen dituztenak ere badira. Ni azken honetara ohitua nago eta maratoia gogorragoa egingo zaidala uste dut.«Bertikalean bitan atera banaiz ere, maratoia guztiz berria da niretzat»
«Ibilbideko zati batzuetan zaleek ia bultza ere egin dutela esan didate»»
