Kilometroak 2018ko ibilbideak 5,9 kilometro eta lau gune izango ditu
Urretxu-Zumarraga ikastolak datorren urriaren 7an ospatuko den Kilometroak jaiaren zirkuitua ezagutzera eman du. Ibilbideak 5,9 kilometro eta lau gune izango ditu: ikastola, Zumarragako plaza-Lizeoa, Etxaburu eta Santa Barbara. Desnibela 200
Urretxu-Zumarraga ikastolak datorren urriaren 7an ospatuko den Kilometroak jaiaren zirkuitua ezagutzera eman du. Ibilbideak 5,9 kilometro eta lau gune izango ditu: ikastola, Zumarragako plaza-Lizeoa, Etxaburu eta Santa Barbara. Desnibela 200 metrokoa izango da.
Lehenengo gunea ikastolan (Urretxuko Pagoeta auzoa) egongo da. Gune nagusia izango da, bertan egingo baitira irekiera ekitaldia, omenaldia eta lekuko ematea. Haurrei eta beraien gurasoei zuzendutako gunea izango da.
Urriaren 7an Urretxu eta Zumarragan elkartzen direnak, ikastolatik Euskadi plazara joango dira, Secundino Esnaola eta Legazpi kaleetatik. Bigarren guneak Zumarragako eta Urretxuko bi leku hartuko ditu: Euskadi plaza eta lizeoa. Bi gune hauek Klara Larrañaga parkearen ondoko zubiak batuko ditu. Gogoan izan aurtengo festaren leloa Zubiak batuz dela. Bigarren guneak azpigune bat izango du: Zelai Arizti parkea. Euskal kultura eta aniztasuna ardatz hartuta, adin guztietako jendearentzako eskaintza egongo da gune zabal honetan.
Lizeotik gora, Labeaga kalera joango dira. Kiroldegi aurretik pasa ondoren, Santa Barbarako bidea hartuko dute. Aldapan gora hasi baino lehen, bi topagune izango dituzte Kilometroak jaiaz gozatzera datozenek: Aldiri kiroldegian 1.000 lagunentzako bazkaria eskainiko da eta Nekolaldeko aparkalekuan artisau azoka egongo da.
Hirugarren gunea Etxaburun egongo da. Bertan, gazteentzako kontzertuak egongo dira. Gora jarraituz, Santa Barbarara helduko dira: laugarren gunera. Hemengo eskaintza ere gazteei zuzenduta egongo da bereziki. Bertatik, ikastolara itzuliko dira.
Ibilbidea gaur gauean aurkeztu dute, Kilometroak Txikiaren eta ikastolako afariaren ondoren. Kilometroak Txikiaren helburua festa txikienei gerturatzea da. Hori dela eta, protagonista nagusiak izan dira eta beraientzako ekitaldi asko egon dira.
Festa ikastolan hasi da. Ikasleek eman diete ongi etorria bertaratu direnei. Ondoren, Kilometroak egunean bezala, omenaldia egin da: ikastolako mendi taldea omendu dute. 1982ko urriaren 3an egin zuen mendi taldeak lehen irteera, Irimora. Ordutik, ikasleek Euskal Herriko makina bat tontor eta bazter ezagutu dituzte mendi taldeari esker.
Omenaldiaren ondoren, zirkuitua ireki eta bideari ekin diote. Zinta Julian Arinek (mendi taldearen sortzaileetako bat) eta bere biloba Libek moztu dute.
Adin guztietako haurrentzako jolas eta tailerrak egon dira. Musikak ere izan du tartea egitarauan: Lizeoko Batuz batukadaren erritmo biziak kaleak alaitu ditu eta ikastolako abesbatzak kontzertua eskaini du.
Festari amaiera borobila emateko, ikasturte amaierako afaria egin dute. Zirkuitua aurkeztu ondoren, dantzaldia egon da, Zunbalain musika taldearen eskutik.
Horra hor ikastolak ibilbidea aurkezteko prestatu duen bideoa eta arratsaldeko ekitaldiko argazkiak:
http://youtu.be/McsOthpb2ty
