Uztakale egitarauko azken ekintzak gaur eta bihar, Legazpin
'Sagartu' kale ikuskizuna egingo dute gaur Hika teatroa eta Ohinkari dantza taldekoek
Amaitzear dira Uztakaleren egitarauaren barruan antolatutako ekintzak. Gaur, 19:00etan, Sagartu ikuskizuna egingo dute Hika teatroko eta Ohinkari dantza taldeko kideek. Ekitaldia plazan egitekoak ziren, baina eguraldi iragarpena dela eta, azokako aterpean egingo dute. Bihar Erromeria ibiltaria izango da arratsaldean eta gauean Ikatzak bere azken ikus-entzunezkoa emango du.
Erromeria ibiltaria Legazpiko erdigunean izango da 18:30etik aurrera. Elustondo anai-arreba trikitilariek musika jarriko diote erromeriari eta Korosti dantza taldeko kideek zein animatzen diren herritarrek dantzak gehituko dizkiote. Eguraldik ez badu laguntzen arkupez arkupe joango dira erromeriara biltzen direnak.
Gauean, 22:30ean, Ikatza argazkilari elkarteko kideek bidaietan egindako argazkiekin osatutako ikus-entzunezkoak eskainiko dute Azokan. Uztakalen emango duten laugarrena da, bereziki legazpiarren gustukoa da gainera.
