Gabirian giroa alaitzen, Glaukoma eta Urbi selekta
Zerainen bertso afariarekin eta Elizagoien ahizpen dantzaldiarekin amaituko dira festak
Gabiriarrak parranda gogoz dira oraindik, eta Glaukomak eta Urbi selektak asetuko dituzte nahi guztiak. Arratsaldean altxorarren bila, bolo jolasean eta tokan ibili dira gabiriarrak. Iluntzean, sagardo dastaketan, txistorrarekin eta oilaskoekin indarrak berreskuratuko dituzte, eta 22:30etatik aurrera, Glaukoma eta Urbi selekta arituko dira taulagainean. Urtez urte indarra hartzen ari den festak dira Gabiriakoak: autobus bereziak bete egiten dira inguruko herrietatik doazen parranda zaleekin, eta izen handiko taldeak ekartzen dituzte antolatzaileek.
Rap-reggae doinuekin Tolosatik datorren taldea da Glaukoma. Halere, taldekide batzuk Irungoak eta Donostiakoak ere badira. Ibilbide laburra baina arrakastatsua izan dute: Euskal Herriko entzule askoren belarrietara heldu dira eta jarraitzale asko dituzte.
Zerainen, berriz, gaur amaituko dituzte festak. Eguerdian herriko artzainek egindako gazten probaketa izan dute, eta arratsaldean San Roke bola txapelketa. Gauean herri afaria egingo dute eta, afalostean, Sebastian Lizasok eta Iker Zubeldiak bertsotan jardungo dute. Elizagoien ahizpen dantzaldiarekin amaituko dira aurtengo Andra Mari jaiak; Bihar, herria txukuntzen laguntzeko deia egin dute antolatzaileek.
