Taloak preziatuak izaten dira. Azoka berezi edo jai egunen bat denean, ilara luzeak izaten dituzte talogileek mokadu bat probatzeko. Halere, erraz egiten den jaki bat da: arto irina, gatza eta ura besterik ez dira behar. Gaur arratsaldean Igartza jauregira gerturatutakoek, hiru osagaiak nola nahastu behar diren ikasi dute, talo preziatuak eurek egiteko.
Aurretik, Igartza jauregiaren historia ezagutu dute. Ibilbide luzea du jauregiak, hamaika pasarte gertatu dira pareta horien artean. XIII. menderako bazen jauretxe bat Oria ibaiaren alboan, baina 1420. urtean eraitsi egin zuten Ahaide Nagusien arteko borroken ondorioz.
Igartzako Mariak aukera baliatu zuen, aitzinako pilareen gainean, egungo jauregia eraikitzeko. Beheko solairua harlanduz egina dago eta goiko solairuek egurrezko egitura dute gehienbat. Patioa zabalik du. Oso ezohikoa da halakorik Euskal Herrian, euriak deserosoa egiten duelako. Argi ez dagoen arren, baliteke Gaztelako modak eraginda utzi zuela patioa zapairik gabe Mariak.
Urte loriatsuen ostean, beheraldia etorri zen. Indar fabrika lur berberean eraiki zuten, eta ahaztuta gelditu zen Igartza jauregia. Pentsa, jauregiko errotara ura eramateko ibaian gorago zegoen presa sedimentuek jan zuten, eta 1983. urtean kasualitatez agertu zenean, ustekabekoa eraman zuten beasaindarrek.
Azken urteetan, berreskuratze lan handia egin da jauregiaren inguruan. Egun, bisitatzeko toki ederra da, eta denetariko ekintzak egiten dira bertan.
Goierriko albisteak euskaraz, libre eta kalitatez jaso nahi dituzu? Horretarako zure babesa ezinbestekoa zaigu. Egin zaitez harpidedun, izan HITZAkide! Zure ekarpenari esker, euskaratik eginda dagoen tokiko informazio profesionala garatzen eta indartzen lagunduko duzu.
Tokiko informazioa profesionaltasunez eta euskaratik, modu librean kontatzea da gure eginkizuna. Horretarako zure ekarpena beharrezkoa da, eta ongi maitatzeko modurik zintzoena da HITZAkide egitea.
Ezagutu HITZAkide izatearen abantailak eta aukeratu HITZAkide izateko gustuko modalitatea.
