Ertzaintzak 27 urteko gizonezko bat atxilotu du Ormaiztegin, aire konprimatuko pistola batekin bi laguni mehatsu egitea leporatuta. Gertaerak astearte arratsaldean izan ziren. Zelaikoa auzoko industrialdean, Sagaspe okindegia zegoen eraikinaren atzealdean, 18:30ak aldera, gizonezko bat pistolarekin ikusi zuten lekuko batzuk, eta Ertzaintzari deitu zioten. Hainbat patruila gerturatu ziren, eta lekukoek, gertatutakoa azaldu zieten. Industrialdearen atzealdean zegoen gaztea, pistola eskuan zuela.
Ertzainek ingurua jendez hustu eta arma zeraman gizonezkoa atxilotu zuten. Atxilotzerako unean sasi batzuetara bota zuen pistola. Ertzaintzaren arabera, CO2 bidezko arma bat zen, metalezko bolatxoak botatzen zituena. Bi lagun armaz mehatsatzea leporatuta atxilo hartu zuten, eta Tolosako guardiako epaitegiaren esku utzi zuten.
