Plazaolak eta Garmendiak ‘Moko zorrotza’ antzezlana eskainiko dute
Jon Plazaola eta Aitziber Garmendia aktore goierritarrek Moko zorrotza antzezlana taularatuko dute gaur iluntzean, 22:30ean, Zelai Arizti aretoan. Carles Alberolak idatzi du gidoia, eta Mario Hernandezek zuzendu. Amodioa eta komedia
Jon Plazaola eta Aitziber Garmendia aktore goierritarrek Moko zorrotza antzezlana taularatuko dute gaur iluntzean, 22:30ean, Zelai Arizti aretoan. Carles Alberolak idatzi du gidoia, eta Mario Hernandezek zuzendu. Amodioa eta komedia uztartzen dituen antzezlana da.
Plazaolak eta Garmendiak Juan eta Laura gorpuztuko dituzte. Bizitza ulertu eta aurrera egiteko bi modu dituzte, erabat kontrajarriak, baina elkar maite dute. Institutuko garaitik ezagutzen dute elkar, eta 30 urtetako krisi amaigabean murgilduta, ustekabean egingo dute topo. Iraganeko gogorapen eta ametsak gaurkotuko dituzte. Bereziki, bete ezin izan zirenak.
Bien bitartean, ikuslearen hasierako algarak hausnarketa bilakatuko dira: «Azkarregi hazi ote gara? Edo ez dugu garapenik izan? Helduen arropaz jantzitako umeak ote gara? Edo ume izaten tematuta dauden pertsona helduak? Zer demontre egin geure bizitzekin? Zer da bizitza: amets eta algarak, barre eta negarrak, hutsune eta begiratuak, maitasunaren gehiegikeriak eta ezinezko amodioak».
Txalo Produkzioek ekoitzitako antzezlana da. Esperientzia handiko ekoiztetxea da. Egun, bederatzi antzezlan ditu ikusgai. Besteak beste, Joseba Apaolaza urretxuarra protagonista duen Ergela, Zoaz pake santuan, Ondoko hilobiko tipoa edo haurrei bideratutako Mendi tontorrean. Azaroaren 25ean izango da haurrentzako antzerkia Labeaga Aretoan.
Antzezlana euskara hutsean izango da. Sarrerak leihatilan eskura daitezke emanaldiaren aurretik hamar euroren truke. Gazte Txartela aurkeztuz gero, zazpi euro balio du sarrerak.
