Ur Kontsortzioak eta foru aldundiak 3.250.000 euro inbertituko dituzte Goierrin

Itsason, Ezkion, Ormaiztegin, Beasainen, Zumarragan eta Zerainen sei proiektu egingo dituzte. 2018-2022 epe aldian gauzatuko dira. Hitzarmena sinatu dute foru aldundiak eta Ur Kontsortzioak

Loinaz Agirre

Beasain,Ezkio,Itsaso,Ormaiztegi,Zerain

2018/12/19

Ezkioko herriguneko hondakin urak jaso eta kolektorera eramateko lanak egingo dituzte // Gotzon Aranburu

Jose Ignacio Asensio Gipuzkoako Foru Aldundiko Ingurumeneko eta Obra Hidraulikoetako diputatuak eta Olatz Peon Gipuzkoako Ur Kontsortzioko lehendakariak, lankidetza hitzarmen sinatu dute Gipuzkoako hamaika udalerritan 10 milioi euroko azpiegitura hidraulikoetako obren finantzazioa batera gauzatzeko. Goierriko sei herri daude eta sei proiektu daude tartean, 3.250.000 euroko inbertsioarekin: Itsaso, Ezkio, Ormaiztegi, Beasain, Zerain eta Zumarraga. Inbertsio sorta berri hau 2018-2022 aldian gauzatuko da.

Beasaingo Garin auzoa // Ane Arrieta

Jose Ignacio Asensio Ingurumeneko eta Obra Hidraulikoetako diputatuaren esanetan, helburu nagusia «uraren hornikuntza sistemen bermeak indartzea eta hondakin uren saneamendua» osatzea da, «herritarrei uraren horniketa bermatuz erabilera baldintza onenean eta ingurumenari ahalik eta gutxien eraginez». Horretarako, Foru Aldundiak, Ingurumeneko eta Obra Hidraulikoetako Departamentuaren bitartez, bere gain hartu du 5.000.000 euroko gastua, hau da, hitzarmenaren % 50a.

Goierriko proiektuak 2018-2022 epean
· Itsaso. Herriguneko hondakin urak jasotzeko eta Estandako kolektore nagusiraino eramateko obrak. Inbertsioa: 785.000 €. · Ezkio. Herriguneko hondakin urak jasotzeko eta Estandako kolektore nagusiraino eramateko obrak. Inbertsioa: 750.000 €. · Ormaiztegi. Saneamendu kolektorean sartzen diren euri urak desbiratzea. 460.000 €. · Arriarango saneamendua. Garin eta Astigarretako herriguneko isuriei soluzioa ematea, bilketarako bi kolektore diseinatuko dira eta hondakin uren araztegi txiki bana jarri herrigune bakoitzean. 620.000 €. · Zerain. Errekalde auzoko hondakin urak jasotzeko eta Mutiloako kolektore nagusiraino eramateko obra. 450.000 €. · Zumarraga. Eitzaga Goiko etxebizitzen isuriak jasoko dira eta herrialdeko saneamendu sistema nagusiarekin lotu. 280.000 €.

Azken elkarrizketak

Azken bideoak

Argitalpen bereziak