2019ko udal aurrekontua onartu du EAJko udal gobernuak PSE-EEren aldeko botoekin. EH Bilduk eta Irabazik kontra bozkatu dute. Agustin San Martinek kargua hartu du
Abenduko osoko bilkuraren hizpide nagusia beti izan ohi da udal aurrekontuaren aurkezpena eta balizko onespena. Udalbatzak onartu du 2019ko udal aurrekontua, udal gobernuan den EAJko zinegotzien aldeko botoekin eta PSE-EEkoen aldekoekin; aurrekontuen kontra bozkatu zuten EH Bilduko eta Irabaziko zinegotziek. Datorren urteko aurrekontuaren zenbatekoa 11.027.692 eurokoa da, aurtengoa baino %2,24 handiago. Legazpik inoiz izan duen aurrekonturik handiena da, 11 milioi eurotik gorakoa.
Koldobike Olabide alkateak, proiektuaren aurkezpenean, udal finantzen osasuna «bikaina» dela esan zuen: «Zorra 4,7koa da, eta 1,1 milioi euro ditugu inbertsioetarako. Udalak, gaur-gaurkoz, fakturak hamabi egunetan ordaintzen ditu eta lehenengo aldia da gizarte zerbitzuen aurrekontua 2 milioi euro baino gehiagokoa dela».
Inbertsio handienak hartuko dituzten esparruak honakoak dira: gizarte zerbitzuen atzetik, kirola (1.141.049 euro), bide publikoak (888.060 euro) eta hezkuntza (356.443 euro). «Pertsonei zuzendutako aurrekontua da», azpimarratu zuen.
Hastear dagoen urtean gauzatuko dituzten zortzi berritasun aipatu zituen; guztientzako diru sailak aurreikusi dituzte aurrekontuetan. Berritasunak ondokoak dira: Hiri Antolamenduko Plan orokorra berrikustea; Bellotako pentsio zaharra erostea; Santikutz kalean udalak duen etxebizitza konpontzeko obra; Dendak Okupatu programa; eskola materiala erosteko eta negozio txikiei laguntzeko diru laguntza berriak; enpleguaren sustapenerako programaren zenbatekoa %115 igo dute; Matraka taldeari dirulaguntza Martxoak 8ko egitaraua presta dezan; eta udal langileen belaunaldi txandaketa planaren lanketa.
Alberto Bezunartea Irabaziko bozeramaileak hitza hartu zuen, eta aurrekontu proiektuari ezetza emango ziotela iragarri zuen, «arrazoi filosofikoak tarteko». Pentsioaren erosketaren alde daudela esan zuen, «ez horrenbeste zerbitzu publikoak kudeatzeko moduarekin». Hain zuzen, Bezunarteak garai batean pribatizatutako zerbitzuak, lorezaintza adibidez, berriro publiko egitearen aldeko agertu zen. «Aurreztu egiten da eta kalitatezko lanpostuak sortzen dira».
Oscar Valbuena PSE-EEko bozeramaileak «arduraz» jokatu dutela eta agintaldi hasieran EAJrekin adostutako hitzarmenari jarraiki aldeko botoa emango zutela esan zuen.
EH Bilduko Rakel Puentek udal gobernuari egindako proposamenak aletu zituen; besteak beste, Haztegiko DBH eraikinerako igogailua eskatu zuten irisgarritasun arazoak ekiditeko eta Legazpiko idazleei dirulaguntzak ematearen alde agertu ziren. Agustin San Martinek EH Bilduko zinegotzi kargua hartu zuen.
EAJk EH Bilduren proposamenak aintzat hartuko zituen baldin eta zinegotziak abstenitzen baziren eta aurrekontu proiektuan ez zituzten sartuko. Akordiorik ez zen egon eta EH Bilduk kontra bozkatu zuen.
Alderdiek nork bere posizioa agertu zuten aspaldian Legazpin izan den aurrekontuen gaineko osoko bilkurarik lasaienean.
2022ra arteko Euskara Plana aho batez onartu dute
Osoko bilkuran, 2019ko aurrekontuen gaia jorratu eta gero, 2018-2022 laurteko Euskara Plana landu zuten eta aho batez onartu zuten. Iñigo Imaz zinegotziak eskertu zuen udaleko euskara teknikari Inma Urtzelaik egindako lana: «Hari esker udaleko baliabideekin osatu baitugu plana». Eusko Jaurlaritzako Kultura eta Hizkuntza Politika sailak onespena eman dio planari. Imazen hitzetan, «erabilera planaren helburu nagusia euskara zerbitzu eta lanerako hizkuntza izatea da. Finean, zaindu eta bermatu nahi dugu legazpiarrek aukeratzen duten hizkuntzan hartu ahal izatea». Planari baietza eman zioten alderdi guztiek, eta bozeramaile guztiak euskaraz aritu ziren hitzaldietan. EH Bilduko Ana Martinek udalbatzarretan euskaraz aritzera animatu zituen kideak: «Hemendik planari bultzada emateko aukera daukagu».
