Zientziaren aste betea Idiazabalen
Aurreneko aldiz Zientzia Astea egingo dute Idiazabalen; ekintza sorta izango da, astelehenetik igandera. Herritarrentzat tailerrak eta film emanaldiak egingo dituzte, besteak beste
Martxoaren 25etik 31ra Zientzia Astea ospatuko dute Idiazabalen. Lantalde bat eratu da ekimen berri hau garatzeko. Herritarrek eta zientziarekin lotuta dauden zenbait eragile goierritarrek osatu dute lantaldea. Egitasmoa, atzo arratsaldean aurkeztu zuten.
Datorren astelehenean ekingo diote Idiazabalen lehenengo Zientzia Asteari eta egitaraua dagoeneko osatuta dago. Atzoko prentsaurrean eman zituzten horren inguruko xehetasun guztiak.
Batetik, eskola orduetan esperimentuak egingo dituzte Haur Hezkuntzako ikasleek aste osoan zehar. Ekintza honetarako apropos prestatu duten Zientzia Gelan egingo dituzte saioak, 2 eta 5 urte bitarteko ikasleek. Gainera, 6 eta 12 urte bitarteko ikasleek esperimentuak prestatuko dituzte arratsaldeetan eta beste ikasleei azalduko dizkiete ondoren. Aita Iparrragirre Herri Eskolak antolatuko du ekintza hau.
Martxoaren 25etik apirilaren 7ra arte, Emakume berritzailea zientzian erakusketa ikusgai izango da, Udaletxeko areto nagusian, Lemniskata Zientzia Elkarteko kideen laguntzarekin. Erakusketa 10:00etatik 12:30era eta 16:30etik 20:00etara egongo da irekita eta adin guztietako pertsonei dago zuzenduta.
Tailerrak eta gehiago
Aste osorako ekintzez gain, beste hainbat ere antolatu dituzte. Martxoaren 25ean, 17:30ean, robotika eta bideojokoen tailerra, erakustaldia eta hitzaldia egingo dituzte, udaletxean.
Martxoaren 27an Maia Garcia-Vergniory, material topologikoen fisikaria izango da , 18:00etatik aurrera. Martxoaren 29an berriz, 3D inpresora bat montatzeko aukera egongo da. 11 urtetik gorakoentzat izango da udaletxean 17:00etatik 19:30era.
Astebururako ere egitarau bete-betea antolatu dute. Martxoaren 30ean haurrentzako Lego tailerra egingo dute, 16:00etatik 18:30era Guraso Elkartearen egoitzan. Egun berean, Inspira Steam proiektu pilotoa garatuko dute 18:00etatik aurrera. Gainera, Steven Spielbergen Artificial intelligence filmaren emanaldia egingo dute 19:00etan, elkartean bertan.
Azkenik martxoaren 31n, haurrentzako film emanaldia egingo dute 16:00etan.
