Igartubeiti baserriaren erreprodukzioa aurkeztuko dute gaur
Igartubeiti Baserri Museoaren maketa egin du Rosa Garmendiak 1:10 eskalan. Prozesu osoa azalduko du gaur, Ezkioko udaletxeko ganbaran.
Rosa Garmendiak Igartubeiti Baserri Museoaren erreprodukzioaren (eskala 1:10) nondik norakoak azalduko ditu gaur, 19:00etan, Ezkioko udaletxeko ganbaran egingo duten aurkezpenean.
Diapositibak erabiliko ditu Garmendiak lan prozesua xehatzeko eta Yartu kultur elkarteak zein Ezkioko Udalak elkarlanean antolatutako ekitaldira doazenek galderak eta erantzunak egiteko aukera izango dute.
Rosa Garmendia Gipuzkoako Belenzaleen Elkarteko kidea da eta haiek euskal jaiotza bat egitea proposatu zioten Eguberrietan Gipuzkoako Foru Aldundiko atartean jartzeko. 2018ko otsailaren 1etik azaroaren 30era egunero-egunero aritu zen Igartubeitiko erreprodukzioan lanean.
Ekitaldian, Xabier Barriolak zuzendutako Ezkioko eta Itsasoko abesbatzak emanaldia egingo du. Amaieran pintxoak eskainiko dituzte.
Umezaintza zerbitzua egongo dela iragarri dute; zerbitzuaren beharra dutenek aldez aurretik deitu behar dute 943 72 13 03 telefonora.
