Ataun, Legazpi eta Ordiziako auzo banatan ere San Joan festak ospatuko dituzte
Ordiziako Otegi Enea auzoko jaiak eta Ataungo Arrondo auzokoak gaurtik igandera ospatuko dira, eta Legazpiko Telleriarte auzokoak astelehenean
Goierriko hiru auzotan ere San Joan jaiak ospatuko dituzte. Ordiziako Otegi Enean, Ataungo Arrondon eta Legazpiko Telleriarten, hain zuzen ere.
Otegi Enean gaur hasiko dira jaiak. 18:00etan txupinazoa botako dute eta haur krosa egongo da. 19:30ean buruhandiak irtengo dira, 20:00etan Idiazabal gazta dastatuko dute eta 21:00etan Insaniacraw taldeak kontzertua egingo du.
Larunbatean ere makina bat ekitaldi egongo da. 10:00etan txupinazoa botako dute, 10:30ean marrazki lehiaketa egongo da, 11:00etan sukaldari txapelketa hasiko da, 11:30ean Urdaneta taldeak dantza saioa eskainiko du, 13:00etan sukaldari txapelketako sariak banatuko dituzte eta bertso poteoa egingo dute, 13:15ean pintxoak jarriko dituzte salgai eta 14.30ean auzo bazkaria egingo dute.
Ritmo de Luna dantza eskolak saioa egingo du.
Larunbateko ekitaldiekin bukatzeko, 16:30ean mus txapelketa jokatuko da, 17:00etan Gorritiren animaliekin jolasteko aukera egongo da, 18:30ean Ritmo de Luna dantza eskolaren erakustaldia egongo da, 22:30ean su artifizialak egongo dira, 23:00etan Gauargi taldeak joko du eta gauerdian mozorro lehiaketa hasiko da.
Festak igandean bukatuko dira. 11:00etan txupinazoa egongo da, 11:30ean tortilla lehiaketa hasiko da, 12:00etan Laguntasuna errondailak auzoa girotuko du eta 12:30ean tortilla lehiaketako sariak banatuko dituzte eta pintxoak salgai jarriko dituzte.
Arratsaldeko ekitaldiei dagokienez, 16:00etan toka txapelketa hasiko da, 19:00etan sardina jana egingo dute eta 19:30ean DJ Jerry-rekin dantza egingo dute. 22:00etan sua piztuko dute eta ondoren berriro Jerry-rekin dantzatuko dute.
Arrondon ere gaurtik
Ataungo Arrondo auzoan ere festak ospatuko dituzte. Gaur hasiko dira. 18:30etik 20:30era DJ Joar-ekin dantza egingo dute. 19:00etan 12 urtez azpikoen futbolin txapelketa hasiko da, 20:00etan afaria egingo dute eta 22:30ean helduen futbolin txapelketa hasiko da.
Bihar, 12:00etan, mendiko bizikleta proba egingo dute. 16:30ean, berriz, mus txapelketa hasiko da. Igandeko ekitaldiei dagokienez, 09:00etan Olatara ibilaldia egingo dute, 12:15ean haurren toka txapelketa hasiko da eta 13:00etan helduen toka txapelketa. Arratsaldean eta gauean ere ekitaldiak egongo dira: 17:00etan haur jolasak, 20:00etan kalejira, 20:30ean auzo afaria eta gauerdian sua.
Telleriarten, astelehenean
Telleriarteko bizilagunek astelehenean San Joan eguna ospatuko dute. 09:00etan txistulariek goiz eresia egingo dute, 11:00etan meza eta lore bedeinkapena egongo dira, 12:00etan luntxa egingo dute eta 14:00etan bazkaria, 18:00etan haur jolasak egongo dira eta 18:30ean erromeria egongo da.
