Has daitezela Santanastasiak!
Urretxuko Santa Anastasia jaiak bihar hasiko dira. Goierri kirol elkartearen saskibaloi sailekoek irakurriko dute pregoia, taldearen 50. urteurrenean
Gehienentzat iraila hilabete tristea da: lanera itzuli beharra, eguna geroz eta motzagoa… Urretxuarrak iraila heltzeko irrikatan egoten dira, ordea. Izan ere, irailean ospatzen dituzte beraien jai kuttunak: Santanastasiak. Aurtengoak bihar bertan hasiko dituzte.
Mundo Mejor, San Martin eta Pagoeta auzoetan txokolate jana egingo dute, 18:00etan. Ondoren, buruhandi eta erraldoien ibilaldia eta txarangaren kalejira hasiko dira. 19:30etatik aurrera musika bandak eta txistulariek ere joko dute. Aurten, 50. urteurrena ospatzen ari den Goierri Kirol Elkarteko saskibaloi saiolekoek irakurriko dute pregoia, suziria piztearekin batera (20:30).
Hip Hop gaua egingo dute bihar.
22:30ean hip hop jaialdia egingo dute Gernikako Arbola plazan. Kulto Kultibo (Irun), SBRV (Iruñea), Isackese-Seok-Dante (Bartzelona) eta Agresion Verbal (Urretxu-Zumarraga) taldeek parte hartuko dute. Txosnetan ere ekitaldiak egongo dira: 19:00etan poteo girotua gaztetxetik abiatuta, 20:00etan txupinazoa eta 22:00etan Hartz, Abducidos, McOnak eta Project.Te taldeen kontzertua.
Larunbatean, 09:30ean, herriko abelgorrien erakusketa eta lehiaketa egongo da Abenidan. 11:00etatik aurrera lehiaketa batean parte hartzeko aukera egongo da: lehiaketarako hautatutako abelgorriaren pisua asmatzen duenak sari bat irabaziko du. 12:00etan bertso saioa egongo da Abenidan bertan eta zenzentxoak San Martin auzoko parkearen ondoan. Gainera, trikitilariek joko dute. Goizeko ekitaldiekin bukatzeko, 12:30ean lehiaketetako sariak banatuko dituzte eta 13:15ean Haatik dantza konpainiak Errimak oinetan ikuskizuna egingo du Gernikako Arbola plazan.
16:00etan xake txapelketa jokatuko da Areizaga-Kalebarrenen eta gastronomia lehiaketa hasiko da Gernikako Arbolan. Txerri masailak saltsan prestatuko dituzte. 18:00etan gaztetxoentzako sukaldari tailerra egongo da Gernikako Arbolan.
19:00etan txistulari alardean parte hartuko dutenek kalejira egingo dute. Alardea 19:30ean izango da, Iparragirre plazan. Eguraldi txarra eginez gero, kiroldegian izango da. Ordu berean, Alarma Morea taldeak Areizaga-Kalebarren plazan joko du. Ondoren, Alter Ego taldeak joko du. 21:00etan gastronomia lehiaketako sariak banatuko dituzte eta 23:00etan Su Ta Gar taldeak kontzertua egingo du Gernikako Arbola plazan.
Txosnetako ekitaldiei dagokienez, 19:00etan poteo girotua egongo da eta 22:30ean Tatxers, Rude Ska, Nizuritazuneri, Reggae Kulture Band eta Mutilated Judge taldeen kontzertua.
Euskal Jaia, igandean
Igandean urretxuarrek urteko egun handia ospatuko dute: Euskal Jaiaren eguna. 10:00etan txistulari, trikitilari eta dultzaineroek diana joko dute eta 11:00etan goizeko euskal jaialdia hasiko da Gernikako Arbola plazan. Artisauen erakusketa eta azoka, musika eta erraldoien kalejira egongo dira. 13:00etan Bentazaharreko Mutiko Alaiak taldearekin kantatzeko aukera egongo da, Iparragirre kalean.
17:30ean karrozen ibilaldia hasiko da. 19:15ean iritsiko dira Gernikako Arbola plazara. Aurten zortzi kuadrillek parte hartuko dute. 23:30ean euskararen aldeko kandela piztea egingo dute, gauerdian Bedaioko ingurutxoa dantzatuko dute eta 00:30ean Guri 5! talde gabiriarrak joko du. Hiru ekitaldi horiek Gernikako Arbola plazan izango dira. Txosnetan ere musika egongo da: 23:00etatik aurrera, Starlus eta DJ Loro-ren eskutik.
Astelehenean, 11:00etatik 14:00etara eta 17:00etatik 20:00etara haurrentzako parkea egongo da Belaustegi plazan. 12:00etan moto eta patinete lasterketa egingo dute toki berean. Eguraldi txarra egingo balu, ekintza horiek kiroldegian izango lirateke. 12:00etan zezentxoak eta poniak egongo dira San Martin auzoko plazatxoan eta eta 12:30etik aurrera txarangak herriko kaleetan joko du.
Bazkariaren ostean, 17:30ean, kuadrillek sokatira txapelketan parte hartuko dute. 20:00etan musika bandarekin dantzaldia egongo da Gernikako Arbolan eta 21:30ean kantu-afaria, toki berean. Gaztetxean, 20:00etan, kontzertuak egongo dira Klak!son eta Hezurre DJak-ekin.
Oharrak
Udalak eta elkarteek beraien burua, ondokoak eta herria zaintzeko eta errespetatzeko eskatu diete herritarrei eta jaiez gozatzera etorriko direnei. Larunbatean, 22:00etatik aurrera botiltzarrari eta drogei buruzko informazioa emango da. Bestalde, urretxu.eus webgunean sexu erasoen aurkako informazioa eskura daiteke.
Urtero bezala, autobusak egongo dira Urretxura joateko. Legazpitik ordu erdiro aterako dira, 23:30etik 06:00etara, bihar eta etzi. Zumarragatik Legazpira ere ordu erdiro irtengo dira, 23:45etik 06:15era. Autobusa Saturnino Telleriako biribilgunean eta Zumarragako geltokian geldituko da.
Beasain eta Ordiziara itzultzeko autobusak, berriz, 02:55ean eta 05:25ean izango dira.
