Kaixo aldizkaria, Legorretako gazteak eta Astigarretako festak
Kaixo aldizkarian lagundutako kolaboratzaileei esker oneko ekitaldia egin zieten Urretxun, gaur 25 urte. Legorretan gazte asanblada sortu zuten, eta Beasainen, Astigarretako festak
Kaixo aldizkariko kolaboratzaileei esker ona agertzeko ekitaldia egin zuten Urretxun / M.Luki 
Urretxuko Udalak argitaratzen duen Kaixo aldizkariak 25 urte bete zituen 2004ko azaroan, eta urte horietan guztietan, bertan kolaboratutako herritarrei esker ona adierazteko ekitaldia egin zuten. 90eko hamarkadan sortu zuten aldizkaria, eta ekitaldiaren berri emateaz gain, sorrera hura ezagutu zuten Jon Castrillo eta Kizkitza Ugarteburu ere bildu zituen Hitzak, garai haien eta geroztik izandako garapenaren inguruan hitz egiteko.
Mikel Gerriko eta Haritz Gorostidi legorretarrak / A.Apalategi
Legorretan haize berriak zetozen, eta herriko hainbat gazte, Legorretako Gazte Asanblada sortzeko lehen pausoak ematen ari ziren. “Legorretako lo egiteko herri izateari utzi eta bizitzeko herri” bihurtu behar zuela zioten Mikel Gerriko eta Haritz Gorostidi talde berriko kideek. Geroztik, gaztetxea lortu eta hamabost urteko ibilbide oparoa osatu du gazte asanbladak.
Zeberio eta Mendizabal bertsolariak, Laja eta Landakanda trikitilariekin / A.Oruezabal
Beasainen berriz, festa kontuak. Astigarraga auzoan San Martin jaiak ospatu zituzten asteburuan, eta haien berri ere eman zuen Hitzak. “Giro oso ona” izan zutela zioten antolatzaileek. Herri bazkaria eta Azurmendi eta Nazabal aizkolarien arteko lehia izan zituzten, besteak beste. Han ziren Astigarragan urte askoan ohiko izan diren Laja eta Landakanda trikitilariak ere, Zeberio eta Mendizabal bertsolariek lagunduta.
