Uztailaren 12ko hauteskundeetan "herritarrek erakutsitako ardura zoriondu" du Ordiziako EH Bilduk
EH Bilduk izandako boto igoeraren aurrean "eskerrak" eman dizkiete babesa eman zieten guztiei. Abstentzio datuei erreparatuz, uste dute, goraldia "oso hausnartzekoa" dela.
Ordiziako EH Bilduk “ordiziarrak zoriondu” ditu, uztailaren 12an Legebiltzarrerako hauteskundeetan “erakutsi zuten arduragatik eta osasuna lehenesteagatik”, eta “eskerrak” eman dizkie, “Ordiziako Udalak hauteslekuetan jarri zituen neurriak errespetatzeagatik”, eta baita “konfiantza eman” zieten “1.747 ordiziarrei, eta, nola ez, EH Bilduren proiektua babestu duten 249.000 lagunei”.
Ordiziako EH Bilduk, “uztailaren 12ko hauteskunde hauek betiko gogoan izango” ditu, “birusaren agerraldiak herrian eman zuen kolpearen ondotik, hamaika ahalegin egin behar izan baititu Udalak herritarron osasuna eta bozka eskubidea bermatzeko”.
Ezohiko egoeran egin ziren hauteskundeak, dudarik gabe, eta egoera horrek, hauteskundeen aurreko kanpainan ere eragina izan zuen, bete betean harrapatu baitzuen Ordizian izandako Covid-19aren agerraldiak. Horregatik, “herriko EH Bilduren taldeak bertan behera utzi zuen kanpaina, lehen kutsadura kasuak ezagutu ziren bezain laster”. Birusak eragindako pandemian zehar argi utzi dute, “pertsonak direla erdigunean jarri behar direnak, beste edozerren gainetik”, eta erantsi dute, “horregatik adierazi” dutela “kezka, testuinguru desegoki honetan hauteskundeak egiteagatik”. Uztailaren 12az geroztik “gero eta argiago ikusten ari da -Zarautzen, Tolosan, Tuteran..birusaren agerraldiak izan dira- arrazoiak zeudela hauteskundeak bertan behera utzi eta atzeratzeko”.
Abstentzioa, “aztertzeko” gaia
Abstentzio datuei erreparatuz, uste dute, goraldia “oso hausnartzekoa ” dela: “Zerk eragin duen sakonki aztertu behar dugu politikagintzan gabiltzanok, guztion erantzukizuna baita herritarren parte-hartzea bermatzea”.
Alabaina, testuinguru “zail” horretan, “herrian zein erkidego osoan, EH Bilduren proiektuak herritarren babes masiboa jaso du”. 2016ko hauteskundeetatik 230 bozka gehiago izan dituzte Ordizian eta 23.000 EAEn: “Eskerrak eman nahi dizkiegu herritarron proiektuan konfiantza jarri duten herritar guztiei”.
Azkenik, gogorarazi dute, hasieratik EH Bildu prest agertu zela pandemia honek sortu duen bizimolde berriari egokitu eta gizarteak dituen beharrei erantzuteko, eta jarrera horretan mantentzen dira: “Lanean jarraituko dugu herrian, elkarrekin, herritarron beharrak asetzeko eta guztion ongizatea bermatzeko. Eta indarrez segitzen dugu ezkerretik eraikitzen ari garen herria pertsonak erdigunean jarriz eraikitzeko; gatazkaren ondorioen konponbide justua lortzeko; preso eta iheslariak etxera ekartzeko; gatazkak eragin dituen zauriak itxi eta biktima guztien onarpena, justizia eta erreparazioa lortzeko. Denon artean denon herria eraikitzeko lanean segitzen dugu”.
