Lizarrustiko paisaia ezagutzeko bisita gidatua egingo dute
Bi saio egingo dituzte larunbat honetan Lizarrusti Parketxetik abiatuta
Lizarrustira bisita gidatua // A.Garmendia Gipuzkoako Parketxe Sareak antolatuta, bi bisita gidatu egingo dituzte datorren larunbatean Allupeko basoak ezkutatzen dituen sinesmen eta kondaira ezagutzera emateko asmoz. Ukitu magikoak dituen ibilaldi honetan, garai batean zuhaitz bakoitzaren inguruan zeuden sinesmenak azalduko dituzte besteak beste. Urteetan zehar kontrabandoan ibiltzen ziren lekuak ikusteko aukera ere izango dute bertaratutakoek.
Larunbateko lehenengo saioa 9:30etan izango da, eta bigarrena 12:00etan. Bisita Lizarrustin hasi eta amaituko da, eta zailtasun gutxiko ibilaldia izango dela adierazi duten arren, mendiko arropa eramatea gomendatu dute.
Bisitaren prezioa 4€ izango da helduentzat eta 2€ haurrentzat. Covid-19ak sortutako egoera dela eta, ezinbestekoa da izena aldez aurretik ematea, eta horrez gain segurtasun neurri guztiak errespetatu beharko dira bertan. Izena emateko edota informazio gehiago eskuratzeko lizarrusti@gipuzkoanatura.eus posta elektronikora idatzi edota 943180335/688895069 telefono zenbakietara deitu beharko da.
