Filmerako moduko bizitza, liburura
Agustin Galabide ormaiztegiarrak biografia idatzi du. Itziar Sistiaga idazleak moldatu dio 'Maldito Gorri' liburuan, nobelaren moldean jarrita. Literatura-trama harrigarria plazaratu du.
Zuek Itxuneko Agustin bezala ezagutzen nauzue, baina hori nire bizitzaren parte txiki bat besterik ez da», ohartarazi du Agustin Galabide Pellejero ormaiztegiarrak. Maldito Gorri (Gorri arraioa) liburua eskuetan du; bere bizitzako eta bizitzaren lana da, zentzu guztietan. Goierriko liburu-dendetan dago salgai: Gerriko (Lazkao), Mirentxu eta Jon Aranburu (Beasain), Larratxa (Ordizia), Pagosa eta Estankoa (Ormaiztegi). Elkarren dendetan ere bai, eta Amazonen ebook-a.
Agustin Galabideren biografia nobelatua da Maldito Gorri. Itziar Sistiaga idazleak (Irun, 1980) moldatu du literaturaren neurrietara, eta haren izenpean atera dute, autoedizioan. Galabidek berak aurrez idatzitako oroimenetan oinarritu da, ordea. Sistiagaren hirugarrena da.
«Betidanik idatzi nahi izan dut nire historia, baina denborarik eta balorerik ez neukan», aitortu du Galabidek hitzaurrean. Sormen idazketa tailerretan apuntatu zen, barrukoa papereratzeko luma zorrozteko. Baina azkenean idazle batengana jo zuen, «historiari arima atera ziezaion». Maldito Gorri da emaitza.
Iazko abenduan azaldu zizkion Itziar Sistiagari egitasmoa eta eskaria. Ez zuten elkar ezagutzen. «Nahi zuena idazten utzi nion», dio Galabidek. Aukerarekin eta historiarekin tentatuta baiezkoa eman, eta otsailetik maiatzera bitartean ondu zuen.
«Amodio historiak, laguntasunenak eta bilaketa pertsonalaren historiak daude. Asko aporta dezakeen pertsona da Agustin. Nahastu, erori eta berriz altxatzen dena da. Beti berrasmatzen ari da, etengabe saiatzen. Horregatik bat egin nuen berarekin. Bere biztizako ateak parez pare ireki dizkit, ezezagunak ginen arren», azaldu zuen Sistiagak azaroaren 21eko aurkezpen telematikoan. Ordura arte eginarekin «zerikusirik ez» zeukan Galabideren historiak. «Nire erosotasun eremutik aterarazi nau», gehitu du idazleak. Galabidek gainbegiratu du prozesua.
Irakurleekin topaketa
Biografia du oinarrian eleberriak, baina badu fikziotik ere. «Kontatzen denaren %90 egia da; beste %10a, berak eta nik sortutakoa», aitortu du Sistiagak. Liburua zabaltze fasean dago orain, eta hilabete batzuk barru irakurleekin topaketa bat antolatzeko asmoa daukate, «Agustinek datu gehiago eman ditzan, eta egia zer den eta lizentzia literarioa argitu dezan».
Booktrailerra ere grabatu dute, historian girotutako trailer edo antzezpen laburra (itziarsistiaga.com). Liburua 326 orrialdekoa da, gaztelaniaz dago, eta protagonistek munduan zeharreko itsasoetan egindako zeharkaldien sei mapa ditu.
