Lazkaon bidea kilometroka zenbatuz
Kilometro erronka egin dute 09:00etatik 14:00etara. Eguerdirako 878 kilometro eginak zituzten. Plaza erdian kartzela bateko patio irudikatuan itzulika ibili dira batzuk, beste batzuk kalean eta mendian egin dituzte kilometroak. Gaur arratsaldeko mobilizazioa girotzeko ekintza izan da.
Gaur arratsaldean Goierriko eta Euskal Herriko ehunka herritan egingo den Bidea gara. Etxeratzeko, Elkarbizitzarako, Bakerako mobilizazioa girotzeko, Kilometro erronka antolatu du Lazkaoko Sarek. “Presoen etxeratze bidea” irudikatu dute, eta plazan jarritako kartzela bateko patioren neurriko itxituran nahiz kalean eta mendian (oinez ala korrika) egin dituzten kilometroak apuntatu dituzte. 09:00etatik 14:00etara egin dute dinamika, eta eguerdirako 878 kilometro eginak zituzten. Parte hartu nahi eta ezin izan dutenek 50 zentimetroren truke kilometroa erosi ahal izango dute. Materiala saltzen ere aritu dira.
