Zumarragako Udalak 'Klik eta jaso' aurkeztu du azoka indartzeko
Saltzaileek bezeroen enkarguak armairu batean utziko dituzte eta erosleak ondo datorkienean pasako dira jasotzera. 32 saltzailek bat egin dute egitasmoarekin
Zumarragako Udalak Klik eta jaso proiektua jarri du abian, larunbatetako azoka indartzeko egitasmoaren barne. Baserritarren txokoaren ondoan armairu bat jarri du, saltzaileek bezeroen enkarguak bertan utzi ditzaten. Hala, erosleak ondo datorkienean pasa ahal izango dira jasotzera.
Proiektua atzo aurkeztu zuten, Mikel Serrano alkateak eta Rosa Maiza zinegotziak. Serranok 2016an larunbatetako azoka biziberritzeko egitasmoa martxan jarri zutela gogoratu zuen. «Saltzaileekin eta erosleekin parte hartze prozesuak egin ditugu eta, baserritarren txokoari dagokionez, margotu egin dugu, argiteria berria jarri dugu eta itxi egin dugu. Horretaz gain, Zumarragako Azoka marka sortu dugu. XXI. mendeko azoka bat da, denei zabalik dagoena».
Egun, azokak 60 postu inguru ditu. «Koronabirusa heldu zenetik, hiru gunetan banatua dago eta 5.000 metro koadro ditu. 60 postu inguru ditu eta 32k Klik eta jaso egitasmoan parte hartzea erabaki dute. Proiektua aldundiari eta Goimeni aurkeztu genien eta 40.000 euroko diru-laguntza lortu dugu».
Koronabirusak egitasmo honi bultzadatxoa eman diola gehitu zuen. «Azoka bertan behera gelditu zen koronabirusa heldu zenean, baina baimena lortu bezain laster berriro antolatu genuen, segurtasun eta higiene neurri guztiekin. Baina koronabirusak saltzaileak eta erosleak Whatsapp bidez ere komunikatzea eta Bizum ere erabiltzea ekarri du eta hurrengo pausoa Klik eta jaso da».
Armairu gehiago
Maiza iritzi berekoa da. «Azokako ekintza planean hartu-eman modu berriak jaso genituen eta koronabirusak hauen ailegaera azkartu du. Hala, azokako 12 baserritar, 14 arropa saltzaile eta 6 janari saltzailek Klik eta jaso egitasmoarekin bat egitea erabaki dute. Zumarragakoazoka.eus webgunean azokako postu guztien berri emango dugu eta egitasmo honetan parte hartzen dutenek telefono bidez saldu ahal izango dute, edozein unetan. Saltzaileak klabe bat du eta produktua armairuko kutxa batean uzten duenean, erosleari kutxa hori irekitzea ahalbidetuko dion klabea helduko zaio telefonora».
Proiektu pilotoa da. Etorkizunean armairu gehiago jarri nahi dituzte gainontzeko merkatariek ere erabili ditzaten. Eta azokakoak arrakasta badu, hozkailuduna jarriko da.
