Goierri Pilota Eskola hasi da berriz entrenatzen
Kasik urtebetez eskolak etenda izan eta gero, aste honetan hasi dituzte gaztetxoen mailako entrenamenduak. Izen-ematea zabalik dago oraindik ere.
Ia urte beteko etenaldiaren ondoren, aste honetan gaztetxoen mailako pilota entrenamenduak hasi dira Urretxuko Ederrena pilotalekuan. Goierri Pilota Eskolak asteartean, otsailak 16, ekin zion berriz ere bere jardunari, eta horrekin batera, itzuli dira pilotari gaztetxoen «praketako lehenengo belaun zulatuak eta eskuetako minak ere!»
COVID-19aren aurkako protokoloen eskakizunei jarraituz, talde txikietan antolatu ditu saioak pilota eskolak. Lehen entrenamenduen ondoren, Urretxuko eta Zumarragako kirolariak «urduritasun apur batekin eta gogoz gainezka» elkartu direla azaldu dute Goierriko ordezkariek, eta «ia urte betez entrenatzerik izan ez duten haur guztiei» ongi etorria eman diete.
Izen-ematea zabalik
Entrenamenduak hasi dira Ederrenan, baina oraindik badago izena emateko aukera. Horretarako, pilota eskolako webgunera jo behar da: goierripilota.blogspot.com.
Jarduerari berriz heldu aurretik, Goierri Pilota Eskolak entrenamendu saioetarako COVID-19-ari buruzko protokoloa zehaztu du, Eusko Jaurlaritzako baldintzak eta Pilota Federazioaren gomendioak jarraituz. Era berean, osasun arduraduna izendatu du, entrenatzaileek eta arduradunek segurtasun prebentzio formazioa egin dute, eta entrenamendu saioak araudi berrietara egokitu dituzte.
