Artisautza lehiaketa antolatu dute Urretxun
Iparragirre 12 artisautza sustatzeko elkarteak Nire barruan artisau bat! izeneko lehiaketa antolatu du Lehen Hezkuntzako 3. mailako haurrentzat.
Elkarte honek Urretxuko Iparragirre kalean lokal bat du eta udaberriaren gaia jorratzen duten artisautza lanekin apaindu nahi du. Parte hartu nahi duten haurrek aste honetan bertan entregatu behar dituzte beraien lanak: bihar, etzi edo ostiralean, 18:00etatik 20:00etara, lokalean bertan.
Lehiakide bakoitzak artisautza lan bakarra aurkeztu ahal izango du. Edozein material erabili daiteke: papera, kartulina, feltroa, artilea, oihalak, kotoizko hariak, erretxina…
Artisautza lanarekin batera fitxa bat aurkeztu behar da. Bertan, izen-abizenak, helbidea, telefono zenbakia eta lanaren deskribapen labur bat azaldu behar dira. Maiatzaren 28an emango dute ezagutzera irabazlearen izena. 50 euroko bonua emango diote, lokaleko artikuluetan gastatzeko. Lehiaketako lan onenak erakusleihoan erakutsiko dira.
