Aizkorrikoek Betsaiderako txangoan parte hartuko dute
Aizkorri Mendi Elkarteak Euskal Herriko Mendi Federazioak Betsaidera antolatzen duen mendizale bilkurara batu dira. Igandean izango da txangoa baina ostiralean eman behar da izena
Aizkorri Mendi Elkartekoak Betsaidera joango dira igandean, Euskal Herriko Mendi Federazioak antolatutako txangoan. 08:00etan irtengo dira, autobusez; Kanpazarren utziko ditu eta handik joko dute Betsaideko tontorrera.
Joateko izena eman behar da, ostiralean, Arana kaleko elkartearen egoitzan, 19:00etan.
Aizkorrikoek urtero egiten dute bat Euskal Herriko Mendi Federazioak antolatutako mendizale bilkurarekin. Urtean zehar mendian hildako mendizaleak omentzen dituzte. Izan ere, Betsaideko tontorrean hildakoen omenezko oroigarria altxatu zuten, federazioak bultzatuta. Iraileko hirugarren igandean izaten da bilkura.
