Gaur ekingo dio Orkatz Abesbatzak ikasturte berriari
Lehen entsegu eguna izango dute gaur. Taldean lehenengo pausuak eman nahi dituztenek, aldiz, urriaren 1ean izango dute hitzordua.
Zegamako Orkatz Abesbatzak denboraldi berriari ekingo dio gaur. Lehenengo entsegu eguna izango dute, eta 2021-2022 ikasturteari hasiera emateko abesti polit eta dibertigarriak prestatu dituzte. 19:00etan Orkatz Txikik entsegatuko du, 20:00etan Orkatz Gaztek eta 21:00etan Orkatz Helduak. Ludotekan izango dira entseguak. Ordutegi hori jadanik abesbatzako kide direnentzat izango da. Aurten abesbatzan lehenengo pausuak eman nahi dituzten herritarrek, aldiz, urriaren 1ean izango dute aukera. Kantuaren bidez ondo pasatu nahi duten herritarrak animatu dituzte parte hartzera eta urriaren 1eko entsegu horretara joatera.
