Atxipiren jolasetan izena emateko epea gaur amaituko da
Banaka edo taldeka eman daiteke izena. Bost eta hamabi urte bitarteko haurrei bideratutako jolasak izango dira
Haurrak Beizamako plazan jolasean. Atxipik lehen Txilibutxofen lekukoa hartu du Atxipi aisialdi elkarteak haurrentzako jolasak antolatu ditu asteburu honetarako. Parte hartzeko izena eman beharra dago. Gaurkoa da horretarako azken eguna. Bakarka edo taldean eman daiteke izena.
Taldeak bost eta zortzi lagun artekoak izan behar dute. Antolatzaileek adinaren arabera elkartzea eskatu dute, ahal den neurrian. Bost eta hamabi urte bitarteko haurrentzat pentsatutako jolasak izango dira. Hau da, Haur Hezkuntzako bosgarren mailatik Lehen Hezkuntzako seigarren mailara arte.
Jolasen ardatza euskal mitologia izango da. Larunbatean elkartuko dira, 16:30ean, herriko plazan.
