Irizar Taldeak bere kamioi elektriko berritzailea aurkeztu du Solutrans azokan
Asteartean hasi zen eta bihar amaituko da Lyon Eurexpon ospatzen ari den nazioarteko azoka.
Irizar Taldeak bere kamioi elektriko berritzailea aurkeztu du Solutrans nazioarteko azokan. Egunotan ari dira azoka ospatzen, Lyon Eurexpon. Asteartean hasi zen eta bihar izango da azken eguna. Irizar ie truck zero igorpeneko kamioi iraunkorra da, atmosferaren kutsadurarik zein kutsadura akustikorik sortu gabe hiri zein inguruneetako beharrei erantzuteko. Enpresak azaldu duenez, “hiri iraunkor eta adimendunentzat” diseinatutako kamioia da, “energia eraginkortasun bikainagatik eta ustiapen kostu bikainagatik”.
Batetik, 5. halleko 14. erakusmahaian, 3 ardatzeko txasisdun bertsioa dago erakusgai, eta baita Irizar Taldeak garatu eta ekoitzitako irtenbide teknologikoei buruzko informazioa ere. Bestetik, 4.2 pabilioiaren kanpoaldean, Irizar ie trucka dago, bisitariek probatu eta testatu dezaten. Atzeko karrozeriadun ibilgailua da, bertsio elektrikoan eta gas natural konprimituzko eremu hedatzailearekin. “Solutrans toki ezin hobea bihurtu da Irizar Taldeak, autobusen eta autokarren fabrikazioaren sektorean 132 urteko esperientzia luzearekin eta elektromugikortasunaren sektorean 10 urtetik gorako esperientziarekin, hiri zerbitzuetarako eta metropoli eremuetarako ibilgailu jasangarrien arloan dituen berritasunak azaltzeko”.
