Duela 30 urte, Urretxuko Udalak mahai bat jarri zuen bidegorrian. Herritarrek bertaraino joateko ohitura hartu dute: mahaia errotonda gisa erabiltzen dute, norabidez aldatzeko.
Goierrin errotonda berezi asko daude: CAFeko lokomotora duena Beasainen, Pott-eko emakumeen eskultura duena Zumarragan, Patrizio Etxeberria fabrikako makina duena Legazpin… Baina bereziena Urretxuko bidegorrikoa da, oinezkoek erabiltzen baitute.
Errotonda berezi honek 30 urte bete ditu: 1992an Urretxuko Udalak harrizko mahai bat jarri zuen bidegorrian, Agiñako bidegurutzearen ondoan, eta herritarek errotonda gisa erabiltzen dute.
Herritar asko mahairaino joaten dira eta mahaiari itzulia eman ondoren herrira itzultzen dira. «Mahairaino noa» eta «mahairaino joango al gara?» sarritan entzuten dira Urretxun eta Zumarragan. Ez da azalpen gehiago behar. Denek dakite zertaz ari diren. Denak joan dira noizbait mahairaino.
Erabiltzaileen iritzia
Atzo, primerako eguraldia lagun, jende asko atera joan bidegorrira paseatzera. Mahaia errotonda gisa erabili zuenetako bat Eusebio Gonzalez Benito urretxuarra izan zen. 68 urte ditu eta Bellota enpresan lan egin zuen, erretiroa hartu zuen arte.
Egunero joaten da bidegorrira. «Egunero mahairaino etortzen naiz, gutxienez. Batzuetan, beherago joaten naiz. Asko gara egunero mahairaino etortzen garenak. Batzuk ezkerretik ematen diote buelta mahaiari eta beste batzuk eskuinetik». Errotondetara eskuinetik sartu behar da. Seinalea jarri beharko da, istripurik egon ez dadin…
Gonzalezek Urretxuko Udalak Ugalde familiaren kotoi fabrikako harri handi batekin egindako mahaiak erakarpena duela dio. «Batzuk mahaira heldu aurretik ematen dute buelta, baina gehienok mahairaino etortzen gara. Nik neuk, mahaiari buelta ematen ez badiot, ez naiz gustura gelditzen. Mahaiari buelta ematen ez dionak, ez du mahairaino etorri dela esaterik. Are gehiago, nik mahaian geldialdia egiten dut eta luzatze-ariketak egiten ditut mahaiaz baliatuta. Bidegorri hau zoragarria da. Pribilegiatuak gara».
