Gora bertsoak... eta alaitasuna!
Klima aldaketa, pandemia, gerrak, krisia... Badugu kezkatzeko hamaika motibo. Baina ezin gara beldurrak jota bizi. Alaitasun pixka bat nahi edo behar duenak Martxoan Bertsoa txapelketako finala du gaur Urretxun.
Gerrak, pandemiak, janari-dendetan janari falta, gosea, egarria, uholdeak, kiskaltzerainoko beroa… Krisia, krisia eta krisia. Ez dakigu zer etorriko zaigun, baina kezkak, beldurrak eta haserreak jota gaude dagoeneko. Bizi al daiteke horrela? Alaitasun pixka bat ere beharko dugu ba… Eskerrak Martxoan Bertsoa dugun! Bizipoz apur bat nahi duenak, Urretxuko gaztetxean du zita. Gaur, 22:30ean, Martxoan Bertsoa txapelketako finala jokatuko da bertan.
Aurtengo Martxoan Bertsoa txapelketa oso berezia izan da. Izan ere, pandemiaren ondoren, jendea kultur ekitaldien egarri da. Gainera, txapelketaren azken edizioa 2018an egin zen. Ordutik, hainbat arrazoi medio, ezin izan da egin.
Aurtengo txapelketan zortzi hirukotek parte hartu dute. Tapia ta Leturias (Mikel Iturriotz, Mattin Aranburu eta Jon Mendizabal), Bertso Olariak (Ane Beloki, Jone Narbaiza eta Lierni Ugarte) eta Xaguxar Zopa (Iñigo Ramos, Jon Aztiria eta Manex Mantxola) sailkatu dira finalera.
Legazpiko neska gazteak
Saio guztietan tabernak lepo bete dira eta bertsolariek giro ona azpimarratu dute. Finala sekulakoa izatea espero dute. «Ez dut beste bi saioak ikusteko aukera izan. Gure saioaren balorazioa oso positiboa da. Nire taldekideek lehenengoz parte hartu dute eta oso gustura daude esperientziarekin», dio Bertso Olariak taldeko Belokik.
Bertso Olariak taldeak hiru bereizgarri ditu: gazteena da, emakumeek osatutako bakarra da eta Legazpiko bakarra da. «Aspalditik, urtero Legazpiko talderen batek parte hartzen du».
Finalean, legazpiarren babesa izango dute. «Ez dugu autobus bat beteko, baina kuadrillakoek, gurasoek eta bertso eskolakoek finalera joateko asmoa dute».
Borroka latza izango dela uste du. «Mikel Iturriotz eta Manex Mantxolak urte asko daramatzaten bertsotan. Manexen taldekideak ez ditut ezagutzen, baina Mikelenak umetatik ari dira bertsotan. Guk freskotasuna, gaztetasuna eta ondo pasatzeko gogoa jarriko ditugu».
Adi Xaguxar Zoparekin!
Xaguxar Zopa taldeko Mantxolak ere asko gozatu du orain arte. «Garai onenen pareko saioak izan dira. Jendea oso adi egon da, entzuteko gogoarekin». Beraiek ez zuten espero finalera sailkatzea. «Ez dakit finala saria edo penitentzia den… Ea zer gertatzen den. Gozatzera joango gara. Aspaldiko partez, Gazteleku jendez gainezka egongo da».
Beste bi taldeen maila azpimarratu du. «Legazpiarrek bertsotan oso fin egiten dute. Oso ondo, goitik behera. Eta Mikel Iturriotzek sekulako lana egin du Martxoan Bertsoaren alde. Azkarate berritzat jo dezakegu».
Tapia ta Leturias
Iturriotz ere ilusionatuta dago. «Kanporaketak oso ondo egon dira. Bertsoak entzuteko gogoa zegoen. Hiru saioetan tabernak bete egin dira eta giro ona egon da. Gainera, bertsolariek maila ona eman dute».
Finala ere primerakoa izatea espero du. «Gaztetxea goraino beteko da eta hori pozgarria da. Legazpiarrek sekulako saioa egin zuten eta xaguxarrek ikuskizun bikaina eskaini zuten. Gu ere prest gaude!».
Doazela pikutara indarkeria zale, diru-gose eta triste guztiak! Ongi etorriak alaitasun eta bizipoz apur bat dakarten guztiak! Eskerrik asko, gazteak, Martxoan Bertsoa antolatzeagatik. Kantatzen duen herria ez da inoiz tristurak eta beldurrak jota hilko!
