Zirt edo zart egiteko garaia

Beasainek bigarren amaitu du liga. Igoera kanporaketak hasiko dituzte asteburuan, Barakaldon. Zuzendaritzak autobusa eta sarrera doan jarri ditu

Kerman Garralda

Beasain

2022/05/02

Beasainek hil ala bizi jokatuko du aurrerantzean. Aurretik dituen hiru partidetan garaile irteten bada, Espainiako Futbol Federazioaren 2. mailan jokatuko du datorren denboraldian.

Beasainek liga bigarren amaitu duenez, berdinketa guztiak bere aldekoak izango dira

Igandean izango dute lehen partida, Basconiaren aurka. Barakaldon (Bizkaia) jokatuko dute, Lasesarren, zelai neutralean, 17:30ean. Zaleen berotasuna sentitzeko zuzendaritzak sarrera eta autobusa doan jarri ditu. “Horrelako aukera bat ez da noiznahi gertatzen”, diote. Gainera, klubak pandemia garaian zaleek eta “bereziki” bazkideek emandako babesa itzuli nahi du keinuarekin. Xerbera tabernan eman behar da izena. “Zeharo garrantzitsua da partidu erabakigarri honetan ahalik eta zaletu bagoilari gehienen presentzia izatea”.

Astebuan amaitu dute liga erregularra. Hiruna berdindu zuten Leioaren aurka, etxetik kanpo. Aitor Loreak, Alain Eizmendik eta Julen Etxabegurenek sartu zituzten golak. Irabazten hasi ziren arren bizkaitarren 3 eta 1eko aldea lortu zuten; txuri urdinek, baina, azken hamar minutuetan sekulako balioa duen puntua berreskuratu zuten. Izan ere, puntuari esker bigarren amaitu dute eta hala, kanporaketetako balizko edozein berdinketa euren aldekoa izango da.

Sailkapena:
Pos.	Taldea	Puntuak	JP	IP	BP	GP	AT	KT
1	ALAVES S.A.D “B”	76	38	21	13	4	72	31
2	BEASAIN S.D.	70	38	19	13	6	65	36
3	PORTUGALETE C.	70	38	19	13	6	60	33
4	BARAKALDO C.F.	69	38	20	9	9	64	46
5	BASCONIA C.D.	65	38	18	11	9	45	32
6	VITORIA C.D.	59	38	16	11	11	55	49
7	SAN IGNACIO C.D.	58	38	17	7	14	57	48
8	CULTURAL DE DURANGO	57	38	13	18	7	42	29
9	S.D. LEIOA	56	38	15	11	12	55	38
10	ANAITASUNA C.D.	52	38	14	10	14	48	49
11	LAGUN ONAK C.D.	51	38	13	12	13	42	44
12	PASAIA K.E.	50	38	13	11	14	36	43
13	DEUSTO S.D.	49	38	11	16	11	42	40
14	URDULIZ F.T.	45	38	12	9	17	39	57
15	AURRERA K.E.	38	38	10	8	20	36	55
16	SANTUTXU F.C.	38	38	8	14	16	42	60
17	URITARRA K.T.	38	38	10	8	20	38	52
18	AMURRIO C.F.	37	38	8	13	17	39	45
19	BETI GAZTE K.J.K.E.	26	38	6	8	24	34	80
20	TOLOSA C.F.	26	38	7	5	26	43	87

Beasainek sekulako bigarren itzulia egin du: partida bakarra galdu dute eta hamabi, irabazi. Hamabost partida daramatzate galdu gabe. Itzuliko talderik onena izan dira, Alavesen bigarren taldearekin batera.

Errege Kopa behintzat, bai

Beasainek 2022/2023 denboraldian Errege Kopa jokatuko du, igoera kanporaketetan pasatzen dena pasata ere. Izan ere, multzoko lider amaitzeak koparako sailkapena ere bazuen sari gisa, harrobiko taldea izan ezean. Euskadiko multzoko lehendabizikoa Alavesen bigarren taldea izan denez, txartela bigarren sailkatuari dagokio. Beasainek kopa azkeneko aldiz duela 20 denboraldi jokatu zuen. Orduko hartan, Gramenet talde bartzelonaren aurka jokatu zuen aurrekanporaketa. 2 eta 1 galdu zuten.

Bigarren talde beasaindarra ere denboraldi aparta burutzen ari da. Ohorezko Mailara igotzeko jokatuko diren finalerdietarako sailkatuta dago jada. Atzo, Loinazen, Tolosaren aurka 4-0 irabazita, bere multzoko lidergoari eusten dio eta, horrela amaituz gero, finalerdietako itzulerako partida etxean jokatzea bermatuko du.

Azken elkarrizketak

Azken bideoak

Argitalpen bereziak