Faltan zen jai asteburua
Festa asteburua antolatu dute Idiazabalgo Udalak eta Festa Batzordeak. Izurri Berria, Nafarroa 1512, Kilimak, Modus Operandi eta Zirkinik Bez taldeen kontzertuak egongo dira
Kilimak taldea, asteburuko kontzertuetan joko duenetako bat. Bi urteko etenaren ondoren, idiazabaldarrak berriz elkartzeko unea iritsi da. San Blas jaiak bertan behera geratu zirenez, festa asteburua antolatu dute Idiazabalgo Udalak eta Festa Batzordeak herriko taldeekin elkarlanean, Idiazabal Jai Jai lelopean. Gaurtik igandera arte festa giroa izango da herrian. Musika, herri kirolak, bazkaria, plater hausketa txapelketa edota txirrindulari lasterketak izango dituzte. Egitarauko marrazkiak Maddi Caamaño herritarrak egin ditu. Iazko aire zabaleko pintura lehiaketan haurren kategorian irabazle izan zen.
Kontzertuak futbitoan izango dira. Izurri Berria eta Nafarroa 1512 taldeek joko dute gaur, eta bihar, aldiz, Kilimak, Modus Operandi eta Zirkinik Bez taldeek. Bihar eguerdian, paella bazkaria egingo da. Txartelak Izparren erosi daitezke, 5 euroan. Herria apaintzeko, udalak ikurriñak jartzera animatu ditu herritarrak. Igandera arte, aurreko astean ospatu zen aire zabaleko II. pintura lehiaketako margolanen eta herriko eskulan taldeen lanen erakusketa egongo da ikusgai udaletxeko areto nagusian.
Bide mozketa
Festak direla eta, trafikoa moztuko dute zati batean. Mediku etxe zaharretik Txomenarenako etxeraino doan errepidea itxita egongo da gaurko 17:00etatik igandeko 21:00ak arte.
Jaien egitaraua
GAUR, OSTIRALA
· 17:00. Playback-a eta txokolate jana, plazan, Guraso Elkarteak antolatuta.
· 18:30. Fideo, Txin-txo, Segunda eta Kaxkarreko buruhandiak, plazan.
· 19:00. Matraka elektrotxaranga kaleetan zehar.
· 23:00. Rock kontzertuak futbitoan, Izurri Berria eta Nafarroa 1512 taldeekin.BIHAR, LARUNBATA
· 10:00. Plater hausketa herrikoia, Altunariztiko zelaietan, Otsoa elkarteak antolatuta.
· 11:00. Haurren txirrindulari lasterketa, eta 12:00etan helduena.
· 12:00-14:30. Gora kale-txiki txaranga.
· 14:30. Paella bazkaria plazako karpan.
· 15:00. Pancho Balbuena mariatxi abeslaria.
· 18:00. Trikipoteoa Rezusta anaiekin.
· 22:00. Rock kontzertuak futbitoan: Kilimak, Modus Operandi eta Zirkinik Bez taldeak.ETZI, IGANDEA
· 11:30. Lazkaoko erraldoi, buruhandi eta dultzaineroen kalejira.
· 12:30. Herri kirolak plazan.
· 17:00.Haur danborrada.
· 18:30. Segurako talogileak eta Kantu Jira taldearen emanaldia.
· 20:00. Zezen suzkoa eta txistulariak futbitoan.
